300.000 íbúinn
Í desember sl. lá ljóst fyrir að landsmenn yrðu 300.000 snemma árs 2006. Af þessu tilefni ákvað Hagstofa Íslands að setja upp mannfjöldaklukku á vefnum þar sem landsmenn gætu fylgst með fólksfjölgun þar til þrjú hundruð þúsundasta markinu yrði náð. Hraði mannfjöldaklukkunnar tók mið af hreyfingum í þjóðskrá dag frá degi.
Samanborið við flest lönd í Evrópu var fólksfjölgun á Íslandi óvenju mikil alla 20. öldina og nærri lætur að landsmönnum hafi tvívegis fölgað um helming á hundrað árum. Rétt fyrir aldamótin 1900 var íbúafjöldinn 75.000, 150.000 árið 1952 og 300.000 nú í ársbyrjun 2006.
Fram undir 1980 var ör fólksfjölgun hérlendis nær eingöngu rakin til mikillar náttúrulegrar fjölgunar. Lífslíkur jukust alla 20. öldina og í samanburði við önnur Evrópulönd hefur fæðingartíðni hér á landi verið óvenju há. Við upphaf sjöunda áratugarins gat hver kona vænst þess að eignast fjögur börn á lífsleiðinni. Undanfarna ártugi hefur dregið úr frjósemi og um þessar mundir eignast konur hér á landi tvö börn um ævina. Að meðaltali fæðast nú tólf börn á dag og fimm einstaklingar deyja á degi hverjum.
Mannfjöldaklukkan sló 300.000 um kl. 7 um morguninn mánudaginn 9. janúar 2006. Hagstofunni þótti við hæfi að það barn, sem fæddist hér á landi sem næst þessum tíma, teldist þrjú hundruð þúsundasti íbúi landsins. Þetta er drengur sem fæddist á fæðingardeild Landspítala-háskólasjúkrahúss á sjöunda tímanum 9. janúar, sonur Erlu Maríu Andrésdóttur og Haraldar Arnarsonar í Reykjanesbæ.
Halldór Ásgrímsson forsætisráðherra og Hallgrímur Snorrason, hagstofustjóri fóru í heimsókn á fæðingardeildina daginn eftir og afhentu foreldrum drengsins skjal til staðfestingar á því að sonur þeirra teljist þrjú hundruð þúsundasti skráði íbúi Íslands.
Meðfylgjandi myndir voru teknar við það tækifæri:
|
|
| |
|
|
| |