Tæplega 2.600 manns starfa í framhaldsskólum eins og á síðasta skólaári
Haustið 2009 voru 2.582 starfsmenn í framhaldsskólum landsins í 2.564 stöðugildum. Þar af voru 1.911 starfsmenn við kennslu í 1.980 stöðugildum. Breytingar á fjölda starfsmanna í framhaldsskólum milli ára eru óverulegar. Starfsmönnum hefur fjölgað um einn frá fyrra ári en starfsmenn sem sinna kennslu eru jafn margir og fyrir ári síðan. Stöðugildum í framhaldskólum landsins hefur fjölgað um eitt á milli ára sé miðað við alla starfsmenn en fækkað um sjö þegar einungis er miðað við þá starfsmenn sem koma að kennslu.
Yfir 82% kennara í framhaldsskólum hafa kennsluréttindi, ekki fleiri síðasta áratug
Alls höfðu 82,2% starfsmanna við kennslu í nóvember 2009 kennsluréttindi og hefur fjölgað úr 78,0% árið áður. Með réttindakennara er átt við þann starfsmann við kennslu sem hefur leyfisbréf frá menntamálaráðuneytinu til að kalla sig framhaldsskólakennara. Hlutfall réttindakennara hefur ekki verið svona hátt frá því að gagnasöfnun Hagstofunnar hófst fyrir áratug. Hæst var hlutfallið skólaárið 2005-2006 eða 78,7%.
Af þeim sem starfa við kennslu hafa hlutfallslega fleiri konur en karlar kennsluréttindi. Skólaárið 2009-2010 höfðu 86,9% kvenna kennsluréttindi en 77,1% karla. Öll árin sem gagnasöfnun Hagstofu um starfsmenn skóla hefur staðið hafa hlutfallslega fleiri konur haft kennsluréttindi en karlar.
Fjórðungur kennara með meistaragráðu eða doktorsgráðu og hafa ekki verið fleiri
Rúmur fjórðungur framhaldsskólakennara (25,4%) er með framhaldsmenntun úr háskóla, þ.e. meistaragráðu, doktorsgráðu eða sambærilega menntun. Kennurum með framhaldsmenntun hefur fjölgað um 2,3 prósentustig frá fyrra skólaári og hefur hlutfall framhaldsskólakennara með framhaldsmenntun ekki verið svo hátt síðasta áratug, þ.e. frá upphafi gagnasöfnunar Hagstofu Íslands. Sjötíu prósent framhaldsskólakennara hafa lokið grunnprófi úr háskóla eða sambærilegum prófum en dæmi um slík próf eru t.d. Bachelorpróf eða sambærilegt. Minna en 5% kennara hafa lægri menntun en Bachelorgráðu eða að ekki er vitað um menntun þeirra. Skólaárið 1999-2000 voru 16,3% framhaldsskólakennara með framhaldsmenntun úr háskóla. Kennurum með framhaldsmenntun úr háskóla hefur því fjölgað um sem nemur 9 prósentustigum á síðasta áratug.
Kennurum yfir fimmtugt fjölgar
Framhaldsskólakennarar eru fjölmennastir í aldurshópnum 50-59 ára eða 32,4% starfsmanna við kennslu í nóvember 2009. Kennurum 50 ára og eldri fjölgar um 12 en fækkar um jafn marga í aldurhópnum 49 ára og yngri frá fyrra ári. Konur eru talsvert fleiri en karlar í yngri aldurshópunum en karlar eru fleiri í aldursflokkum 50 ára og eldri.
Um gögnin
Gögn um starfsfólk í framhaldsskólum eru fengin frá Fjársýslu ríkisins og frá skólunum. Viðmiðunartími gagna er nóvember fyrir þau gögn sem safnað hefur verið fyrir undanfarin skólaár. Árin 2001–2004 var gögnum safnað í marsmánuði en fyrir árin 1999 og 2000 í febrúarmánuði. Til starfsfólks á framhaldsskólastigi telst allt starfsfólk sem var í launaðri vinnu í nóvember 2009. Starfsfólk við kennslu eru allir þeir sem stunduðu einhverja kennslu á viðmiðunartímanum. Kennarar sem ekki voru við kennslu á viðmiðunartímanum, s.s. vegna barneigna- eða námsleyfis, eru ekki taldir sem starfsmenn við kennslu. Þeir teljast þó með í heildarfjölda starfsfólks ef þeir fengu laun á tímabilinu. Menntun starfsfólks byggist á hæstu gráðu eða prófi sem starfsmaður hefur lokið.