Fiskafli íslenskra skipa í október var rúm 81þúsund tonn sem er 13% meiri afli en í október 2015. Botnfiskafli nam rúmum 40 þúsund tonnum og dróst saman um 2% samanborið við október 2015. Aukning var í þorskafla á milli ára en samdráttur í öðrum botnfisktegundum. Uppsjávarafli var tæp 39 þúsund tonn í október sem er 40% meiri afli en í október 2015. Síld var uppistaðan í uppsjávaraflanum og veiddust rúm 32 þúsund tonn af henni samanborið við tæp 23 þúsund tonn í október 2015.

Á 12 mánaða tímabili frá nóvember 2015 til október 2016 hefur heildarafli dregist saman um 232 þúsund tonn eða 18% samanborið við 12 mánaða tímabil ári fyrr. Á tímabilinu hefur botnfiskafli aukist um 11% en samdráttur í heildarafla skýrist nær eingöngu af minni loðnuafla.

Afli í október  metinn á föstu verðlagi var 2,9% meiri en í október 2015.

Upplýsingar um fiskafla sem birtast í þessari fréttatilkynningu eru bráðabirgðatölur. Þær byggjast á upplýsingum Fiskistofu sem berast frá löndunarhöfnum innanlands (Lóðs), útflytjendum afla og frá umboðsmönnum erlendis og er safnað af Fiskistofu.

Talnaefni