Gagnaarkitekt

Hagstofa Íslands leitar að skipulögðum og framsýnum gagnaarkitekt sem hræðist ekki áskoranir.

Í starfinu felst að hanna, smíða og leiða áfram þróun á gagnaarkitektúr Hagstofu Íslands. Um er að ræða mikilvægt starf innan Hagstofunnar þar sem lagður er grundvöllur að umsjón gagna innan stofnunarinnar með skipulögðum, aðgengilegum og öruggum hætti og þannig að gögnin henti sem best til hagtölugerðar. Gagnaarkitekt hannar vöruhús gagna og aðrar gagnalausnir auk þess að koma að undirbúningi gagnaaflana og hvernig gögn eru skipulögð.

Starfið er staðsett í þróunardeild Hagstofunnar en í því felast mikil samskipti við aðrar deildir og svið stofnunarinnar.

Helstu verkefni og ábyrgð

• Hanna, smíða og leiða áfram þróun á gagnaarkitektúr Hagstofu Íslands.
• Tryggja skipulagða, aðgengilega og örygga umsjón gagna í vörslu stofnunarinnar.
• Koma að undirbúningi gagnaaflana.
• Vinna að skipulagi gagna.

Hæfniskröfur

• Háskólamenntun í félagsfræði, stjórnmálafræði eða öðrum greinum sem veita þekkingu og færni í tölfræðilegri úrvinnslu.
• Farsæl reynsla af því að leiða verkefni um gagnavöruhús, gerð gagnalíkana og greiningu gagna.
• Góð kunnátta í forritunarmáli á borð við Python.
• Reynsla af gagnagrunnsvinnu og mikil kunnátta á SQL.
• Góður skilningur á lýsigögnum og lýsigagnakerfum sem og aðferðum og tólum til að tryggja gagnagæði.
• Geta til að meta hefðbundna og nútímalega gagnaarkitektúrhluta út frá þörfum notenda.
• Geta tileinkað sér nýja hæfni og þekkingu, sérstaklega á sviði vélræns náms (ML) og notkun gervigreindar (AI).
• Mjög góð samskipta- og samstarfsfærni.
• Skipulögð og öguð vinnubrögð.
• Góð greiningarhæfni.
• Geta til að miðla flóknum upplýsingum með skýrum hætti.
• Þekking á R er kostur.
• Þekking á hönnun og innleiðingu á nútímalegum gagnaarkitektúr og hugtökum á borð við skýjaþjónustu (AWS, Azure, GCP), gagnamiðlunar í rauntíma (Kafka, Dataflow) og nútíma gagnavöruhúsatólum (Snowflake, Databricks) er kostur.

Hvað býður Hagstofan upp á?

• Krefjandi og spennandi verkefni.
• Vinnu í samfélagslega mikilvægu hlutverki.
• Skemmtilegt samstarfsfólk.
• Gott mötuneyti.
• Íþróttastyrk
• Samgöngustyrk
• Sveigjanlegan vinnutíma.
• Styttingu vinnuvikunnar.
• Möguleika á fjarvinnu.
• Hjólageymslu og bílastæði.

Frekari upplýsingar um starfið

Laun eru samkvæmt gildandi kjarasamningi sem fjármála- og efnahagsráðherra og Félag háskólamenntaðra starfsmanna Stjórnarráðsins hafa gert.

Með umsókn þarf að fylgja ferilskrá ásamt kynningarbréfi þar sem ítarlega er gerð grein fyrir hæfni umsækjanda í starfið..