Hagstofa Íslands hefur tekið saman tölur um stofnanaþjónustu og dagvistir aldraðra árið 2010. Samantektin sýnir að í desember voru vistrými alls 3.125, þar af voru hjúkrunarrými á dvalar- og hjúkrunarheimilum 2.217 eða 70,9% allra vistrýma. Á milli áranna 2009 og 2010 fækkaði rýmum á dvalar- og/eða hjúkrunarheimilum um 168. Þar af fækkaði dvalarrýmum um 70 og hjúkrunarrýmum um 98, en rýmum á heilbrigðisstofnunum fækkaði um 76 á sama tíma. Árið 2010 voru rúm 54% vistrýma á höfuðborgarsvæðinu, en tæp 46% annarsstaðar.
Stofnanir með vistrými fyrir aldraða eftir tegund í desember 2009 og 2010 | |||||
2009 | 2010 | ||||
fjöldi | % | fjöldi | % | ||
Alls | 3.369 | 100,0 | 3.125 | 100,0 | |
Dvalar- og/eða hjúkrunarheimili | 2.927 | 86,9 | 2.759 | 88,3 | |
Dvalarrými | 612 | 18,2 | 542 | 17,3 | |
Hjúkrunarrými | 2.315 | 68,7 | 2.217 | 70,9 | |
Heilbrigðisstofnanir/sjúkrahús | 442 | 13,1 | 366 | 11,7 | |
Hjúkrunarrúm | 278 | 8,3 | 227 | 7,3 | |
Öldrunarlækningarúm | 164 | 4,9 | 139 | 4,4 |
Alls bjuggu 3.144 á stofnunum með vistrými fyrir aldraða í desember í fyrra og hafði þeim þá fækkað um 47 frá árinu 2009. Konur voru rúm 64% allra vistmanna. Um 9% 67 ára og eldri bjuggu í vistrýmum í desember 2010. Þetta hlutfall var rúm 10% á landsbyggðinni en rúm 8% á höfuðborgarsvæðinu. Árið 2010 bjuggu rúm 21% fólks 80 ára og eldra í vistrýmum aldraðra. Það átti við um rúm 17% karla á þessum aldri og rúm 24% kvenna.
Hagstofa Íslands hefur leitað upplýsinga um stofnanaþjónustu og dagvistir aldraðra hjá rekstraraðilum frá árinu 1993.