Samkvæmt bráðabirgðatölum dróst heildarfjöldi greiddra gistinátta saman um 3,1% á milli áranna 2018 og 2019. Þær voru rúmlega 10 milljónir árið 2019 en tæplega 10,4 milljónir árið 2018. Gistinætur á hótelum og gistiheimilum drógust saman um 1,3%, á gististöðum sem miðla gistingu í gegnum Airbnb og svipaðar síður varð 10,8% samdráttur og 1,9% samdráttur á öðrum tegundum gististaða (farfuglaheimilum, tjaldsvæðum o.s.frv.)
| Greiddar gistinætur ferðamanna 2018-2019 | |||
| 2018 | 2019* | % | |
| Alls | 10.364.886 | 10.040.959 | -3,1% |
| Hótel og gistiheimili | 5.861.091 | 5.785.059 | -1,3% |
| Vefsíður á borð við Airbnb | 1.816.000 | 1.620.000 | -10,8% |
| Aðrar tegundir | 2.687.795 | 2.635.900 | -1,9% |
| *Bráðabirgðatölur fyrir 2019 | |||
4,6% samdráttur á gistinóttum í desember
Heildarfjöldi greiddra gistinátta í desember síðastliðnum dróst saman um 4,6% samanborið við desember 2018. Gistinóttum á hótelum fjölgaði um 1% á meðan 11% samdráttur var á gistiheimilum. Á öðrum tegundum gististaða (farfuglaheimilum, íbúðagistingu o.s.frv.) drógust gistinætur saman um 6% en um 19% á stöðum sem miðla gistingu í gegnum Airbnb og svipaðar síður.
Greiddar gistinætur ferðamanna á öllum gististöðum voru um 504.000 í desember síðastliðnum en þær voru um 528.200 í sama mánuði árið áður. Gistinætur á hótelum og gistiheimilum voru 352.700, þar af 304.700 á hótelum. Gistinætur í íbúðagistingu, farfuglaheimilum o.þ.h. voru um 87.300 og um 64.000 á stöðum sem miðla gistingu í gegnum vefsíður á borð við Airbnb.
Gistinóttum á hótelum fjölgaði um 1%
Gistinætur á hótelum í desember síðastliðnum voru 304.700, sem er 1% aukning frá sama mánuði árið áður. Gistinóttum á hótelum á Norðurlandi fækkaði um 23% en þeim ýmist fjölgaði eða héldust óbreyttar á öðrum landsvæðum. Um 67% allra hótelgistinátta voru á höfuðborgarsvæðinu, eða 204.300.
| Gistinætur á hótelum | ||||||
| Desember | Janúar-desember | |||||
| 2018 | 2019 | % | 2018 | 2019 | % | |
| Alls | 302.422 | 304.722 | 1 | 4.472.870 | 4.519.023 | 1 |
| Höfuðborgarsvæði | 203.267 | 204.287 | 1 | 2.590.618 | 2.514.917 | -3 |
| Suðurnes | 20.178 | 22.341 | 11 | 307.016 | 399.671 | 30 |
| Vesturland og Vestfirðir | 6.978 | 8.098 | 16 | 246.458 | 245.240 | 0 |
| Norðurland | 13.181 | 10.106 | -23 | 321.716 | 337.077 | 5 |
| Austurland | 2.569 | 3.739 | 46 | 102.516 | 118.384 | 15 |
| Suðurland | 56.249 | 56.151 | 0 | 904.546 | 903.734 | 0 |
| Þjóðerni | ||||||
| Íslendingar | 30.072 | 29.997 | 0 | 458.754 | 437.317 | -5 |
| Erlendir gestir | 272.350 | 274.725 | 1 | 4.014.116 | 4.081.706 | 2 |
Heildarfjöldi gistinátta á hótelum árið 2019 var um 4.519.000, og fjölgaði þeim um 1% frá árinu 2018.
Herbergjanýting á hótelum í desember 2019 var 50,6% og féll um 2,7 prósentustig frá fyrra ári. Á sama tíma hefur framboð gistirýmis aukist um 8,9% mælt í fjölda herbergja. Nýtingin í desember var best á höfuðborgarsvæðinu, eða 67,7%.
| Framboð og nýting hótelherbergja í desember | ||||||
| Herbergjafjöldi á hótelum í desember | Herbergjanýting hótela í desember | |||||
| 2018 | 2019 | % | 2018 | 2019 | prst | |
| Alls | 9.973 | 10.856 | 8,9% | 53,3% | 50,6% | -2,7 |
| Höfuðborgarsvæði | 5.065 | 5.399 | 6,6% | 70,1% | 67,7% | -2,4 |
| Suðurnes | 634 | 956 | 50,8% | 56,1% | 39,7% | -16,5 |
| Vesturland og Vestfirðir | 632 | 803 | 27,1% | 20,3% | 18,9% | -1,4 |
| Norðurland | 1.054 | 1.093 | 3,7% | 23,3% | 19,2% | -4,1 |
| Austurland | 394 | 360 | -8,6% | 12,1% | 19,9% | 7,8 |
| Suðurland | 2.194 | 2.245 | 2,3% | 45,0% | 45,7% | 0,7 |
Um 90% gistinátta á hótelum voru skráðar á erlenda ferðamenn, eða 274.700. Ferðamenn frá Bretlandi voru með flestar gistinætur (69.000), þar á eftir komu Bandaríkjamenn (60.300) og Kínverjar (42.000) en gistinætur Íslendinga voru 30.000.
Samkvæmt áætlun sem byggir á svörum úr landamærarannsókn Ferðamálastofu og Hagstofu Íslands voru gistinætur erlendra ferðamanna í bílum utan tjaldsvæða um 2.000 og gistinætur hjá vinum og ættingjum, í gegnum húsaskipti eða annars staðar þar sem ekki var greitt sérstaklega fyrir gistingu, um 17.000.
Lýsigögn
Gistináttatölur fyrir hótel koma úr gistináttagrunni Hagstofu Íslands. Áætlun fyrir gistinætur utan hefðbundinnar gistináttatalningar byggist á niðurstöðum úr landamærarannsókn Ferðamálastofu og Hagstofu Íslands meðal erlendra ferðamanna sem framkvæmd er í Flugstöð Leifs Eiríkssonar. Einnig er byggt á gögnum úr gistináttagrunni Hagstofunnar, að teknu tilliti til upplýsinga um virðisaukaskattskylda veltu frá Airbnb og bílaleigum sem leggja áherslu á útleigu viðverubúinna húsbíla. Þær aðferðir sem beitt er við áðurnefnda áætlun eru í þróun innan Hagstofu Íslands. Tölur sem birtar eru um ógreiddar gistinætur og gistinætur, sem miðlað er í gegnum vefsíður eru því bráðabirgðatölur og geta tekið breytingum með hliðsjón af bættum upplýsingum og aðferðum. Við landsvæðaskiptingu þessara talna er stuðst við vefskröpun og gögn úr gistináttagrunni Hagstofunnar. Frekari lýsigögn um fjölda gististaða, gesta og gistinátta má nálgast á vef Hagstofunnar.
Allar tölur fyrir 2019 eru bráðabirgðatölur.