Gistináttafjöldi á hótelum í febrúar eykst um 8,7% milli ára
Gistinætur á hótelum í febrúar síðastliðnum voru 49.910 en voru 45.940 árið 2003. Gistinóttum fjölgaði í öllum landshlutum nema á Suðurlandi (-12,6%) og Norðurlandi (-0,2%). Á Austurlandi tvöfaldaðist fjöldi gistinátta á milli ára og fór úr 1.030 í 2.170. Á Suðurnesjum, Vesturlandi og Vestfjörðum fóru gistinæturnar úr 2.625 í 3.390 og fjölgaði þar með um 29,2%. Á höfuðborgarsvæðinu voru gistinætur í febrúar 38.500 en voru 36.000 í sama mánuði í fyrra, sem er 7,1% aukning.
Tölur fyrir 2003 og 2004 eru bráðabirgðatölur og eru tölur fyrir aðra mánuði ársins uppfærðar mánaðarlega.
Gistináttafjöldi á hótelum fyrstu tvo mánuði ársins 2004 voru 81.690 en þær voru 76.310 fyrir sama tímabil 2003, sem er 7% aukning milli ára. Gistinætur Íslendinga aukast um 12,9% á tímabilinu en gistinætur útlendinga um 4,9%.