Gistinætur á hótelum í júlí voru 441.500 sem er 22% aukning miðað við júlí  2015. Gistinætur erlendra gesta voru 93% af heildarfjölda gistinátta í mánuðinum en þeim fjölgaði um 23% frá sama tíma í fyrra á meðan gistinóttum Íslendinga fjölgaði um 17%.

Flestar gistinætur á hótelum í júlí voru á höfuðborgarsvæðinu eða 240.400 sem er 25% aukning miðað við júlí 2015. Um 54% allra gistinátta voru á höfuðborgarsvæðinu. Næstflestar voru gistinætur á Suðurlandi eða um 68.600. Erlendir gestir með flestar gistinætur í júlí voru: Bandaríkjamenn með 102.400, Þjóðverjar með 82.000 og Bretar með 41.800 gistinætur.

Á tólf mánaða tímabili frá ágúst 2015 til júlí 2016 voru gistinætur á hótelum 3.303.500 sem er 28% aukning miðað við sama tímabil árið áður.

93,0% nýting herbergja á hótelum í júlí 2016
Nýting herbergja á hótelum í júlí var um eða yfir 90% á öllum landsvæðum.

Athygli skal vakin á því að hér er eingöngu átt við gistinætur á hótelum sem opin eru allt árið. Til þessa flokks gististaða teljast hvorki gistiheimili né hótel sem eingöngu eru opin yfir sumartímann.

Talnaefni