Gistinætur á hótelum í september voru 357.100 sem er 37% aukning miðað við september 2015. Gistinætur erlendra gesta voru 89% af heildarfjölda gistinátta í mánuðinum en þeim fjölgaði um 38% frá sama tíma í fyrra á meðan gistinóttum Íslendinga fjölgaði um 27%.

Flestar gistinætur á hótelum í september voru á höfuðborgarsvæðinu eða 199.600 sem er 30% aukning miðað við september 2015. Um 56% allra gistinátta voru á höfuðborgarsvæðinu. Næstflestar voru gistinætur á Suðurlandi eða um 52.600. Erlendir gestir með flestar gistinætur í september voru Bandaríkjamenn með 100.800, Þjóðverjar með 42.600 og Bretar með 39.600 gistinætur.

Á tólf mánaða tímabili frá október 2015 til september 2016 voru gistinætur á hótelum 3.505.700 sem er 29% aukning miðað við sama tímabil árið áður og 2,7% aukning frá fyrri mánuði á gistinóttum yfir 12 mánaða tímabil.

80,0% nýting herbergja á hótelum í september 2016
Herbergjanýting í september 2016 var 80,0%, sem er aukning um 13,3 prósentustig frá september 2015, þegar hún var 66,7%. Nýtingin var best á Suðurnesjum, eða um 92,3%. Herbergjanýting á höfuðborgarsvæðinu var 87,2%.

Athygli skal vakin á því að hér er eingöngu átt við gistinætur á hótelum sem opin eru allt árið. Til þessa flokks gististaða teljast hvorki gistiheimili né hótel sem eingöngu eru opin yfir sumartímann. Vegna bættrar flokkunar gististaða í gistináttagrunni Hagstofunnar hafa orðið smávægilegar breytingar á tölulegum upplýsingum um gistinætur á hótelum sem ná aftur til upphafs ársins 2015. Töflur á vef Hagstofunnar hafa verið leiðréttar til samræmis við þetta.

Að lokum má nefna að fyrr í mánuðinum hóf Hagstofa Íslands birtingar á tölum frá Samgöngustofu um fjölda bílaleigubíla eftir skráningu og mánuðum. Þær tölur verða uppfærðar mánaðarlega og má nálgast þær á vef Hagstofunnar undir flokknum Hagvísar í ferðaþjónustu.

Talnaefni