Gistinætur á hótelum í september síðastliðnum voru 378.300 sem er 3% aukning frá sama tíma í fyrra. Um 55% allra gistinátta voru á höfuðborgarsvæðinu eða 209.900, sem er 3% aukning frá fyrra ári. Á Suðurnesjum fjölgaði gistinóttum um 10%, 7% á Vesturlandi og Vestfjörðum og 4% á Suðurlandi. Á Norðurlandi fækkaði hins vegar gistinóttum um 3% en á Austurlandi var fjöldi þeirra sambærilegur og í september 2016.

Um 91% gistinátta á hótelum í september var skráð á erlenda ferðamenn og fjölgaði þeim um 6% frá fyrra ári. Gistinóttum Íslendinga fækkaði hins vegar um 17%. Bandaríkjamenn gistu flestar nætur (117.500), síðan Þjóðverjar (38.600) og Bretar (32.900), en gistinætur Íslendinga voru 32.800.

Á tólf mánaða tímabili, frá október 2016 til september 2017, var heildarfjöldi gistinátta á hótelum um 4.206.000 sem er 18% aukning miðað við sama tímabil árið áður.

76% nýting herbergja á hótelum í september 2017
Herbergjanýting í september 2017 var 76,0%, sem er lækkun um 1,7 prósentustig frá september 2016 þegar hún var 77,7%. Á sama tíma hefur framboð gistirýmis aukist um 5,3%, mælt í fjölda herbergja. Nýtingin var best á Suðurnesjum, eða um 89,5%.

Athygli skal vakin á því að hér er eingöngu átt við gistinætur á hótelum sem opin eru allt árið. Til þessa flokks gististaða teljast hvorki gistiheimili né hótel sem eingöngu eru opin yfir sumartímann.

Tölur fyrir 2017 eru bráðabirgðatölur. Um þessar mundir fer fram vinna við endurskoðun á skiptingu gistinátta eftir þjóðerni ferðamanna. Þessi vinna hefur ekki áhrif á heildarfjölda gistinátta en gæti haft áhrif á hlutfall milli erlendra og innlendra ferðamanna. Stefnt er að því að ljúka þessari vinnu fyrir útgáfu endanlegra talna fyrir gistinætur á öllum tegundum gististaða fyrir árið 2017.

Talnaefni