Gistinætur á hótelum í ágúst voru 287.500 sem er 11% aukning miðað við ágúst 2013. Gistinætur erlendra gesta voru 91% af heildarfjölda gistinátta í mánuðinum en þeim fjölgaði um 12% frá sama tíma í fyrra á meðan gistinóttum Íslendinga fækkaði um 4%. Yfir tólf mánaða tímabil hefur fjöldi gistinátta aukist um 13%.

Flestar gistinætur voru á höfuðborgarsvæðinu um 157.800 sem er 3% aukning miðað við ágúst 2013. Næst flestar eru gistinætur á Suðurlandi eða um 49.900 og er aukningin þar um 37% á gistinóttum milli ára fyrir ágúst mánuð. Erlendir gestir með flestar gistinætur í ágúst voru; Þjóðverjar með rúmlega 49.000 gistinætur, Bandaríkjamenn um 44.600 og Bretar um 22.600.    

Nýting herbergja á hótelum í ágúst 2014
Í ágúst mánuði var hæsta nýting herbergja á Suðurnesjum 94,1%, þar á eftir var nýting herbergja á Austurlandi um 91,5%.   

Athygli skal vakin á því að hér er eingöngu átt við gistinætur á hótelum sem opin eru allt árið. Til þessa flokks gististaða teljast hvorki gistiheimili né hótel sem eingöngu eru opin yfir sumartímann.