Gistinætur á hótelum í júlí voru 351.700 sem er 17% aukning miðað við júlí 2014. Gistinætur erlendra gesta voru 92% af heildarfjölda gistinátta í mánuðinum en þeim fjölgaði um 19% frá sama tíma í fyrra á meðan gistinóttum Íslendinga fækkaði um 3%.

Flestar gistinætur á hótelum í júlí voru á höfuðborgarsvæðinu eða 193.200 sem er 18% aukning miðað við júlí 2014. Næst flestar voru gistinætur á Suðurlandi eða um 61.700. Erlendir gestir með flestar gistinætur í júlí voru; Þjóðverjar með 77.300, Bandaríkjamenn með 62.000 og Bretar með 32.200 gistinætur.

Á tólf mánaða tímabili ágúst 2014 til júlí 2015 voru gistinætur á hótelum 2.556.990 sem er fjölgun um 17% miðað við sama tímabil ári fyrr.

94,4% nýting herbergja á hótelum í júlí 2015
Nýting herbergja var best á Suðurlandi eða tæp 98,3%. Á höfuðborgarsvæðinu og á Vesturlandi og Vestfjörðum var nýting á herbergjum rúm 95%. Nýting hótelherbergja var lægst á Norðurlandi eða um 86,6%.

Athygli skal vakin á því að hér er eingöngu átt við gistinætur á hótelum sem opin eru allt árið. Til þessa flokks gististaða teljast hvorki gistiheimili né hótel sem eingöngu eru opin yfir sumartímann.

Talnaefni