Vinsamlegast athugið að þessari fréttatilkynningu var breytt 15. júlí kl. 12.30. Leiðrétt var mánaðarheiti í fyrstu línu fyrstu málsgreinar, úr „maí“ í „júní“, þar sem talað er um fjölda ferðamanna til landsins.

Fjöldi ferðamanna í júní var 173 þúsund ferðamenn og dróst fjöldinn saman um 17% frá sama mánuði árið áður þegar þeir voru 209 þúsund. Ferðamönnum til landsins hefur fækkað um 20% sé heildarfjöldi ferðamanna sem heimsótti Ísland á öðrum ársfjórðungi borinn saman við sama tímabil í fyrra, frá 488 þúsund 2018 niður í 390 þúsund árið 2019.

Gistinætur í maí voru 690.000 sé litið á allar tegundir gistinótta. Drógust þær saman um 10% borið saman við sama mánuð árið áður þegar þær voru 767 þúsund. Mestur samdráttur var á gistinóttum sem miðlað er gegnum Airbnb og sambærilegar vefsíður eða um 29%. Voru þær 89 þúsund í maí samanborið við 125 þúsund 2018. Gistinætur á hótelum drógust einnig saman, þó einungis um 3%. Á sama tíma lækkaði nýtingarhlutfall hótelherbergja á landinu úr 58% niður í 56% og framboð hótelherbergja jókst um 13%, úr 9.200 herbergjum í 10.500 herbergi.

Yfir þriggja mánaða tímabil, mars til maí, hefur heildarfjöldi gistinótta á hótelum dregist saman um 3% borið saman við sama tímabil í fyrra á meðan gistinætur keyptar í gegnum vefsíður á borð við Airbnb hafa dregist saman um 14%.

Brottförum farþega frá Keflavíkurflugvelli fækkaði á sama þriggja mánaða tímabili um 12% og erlendum ferðamönnum fækkaði um tæplega 15%. Samkvæmt tölum ISAVIA fækkaði skiptifarþegum um 43% á sama tímabili.

Á 2. ársfjórðungi hefur skiptifarþegum fækkað um 48% frá fyrra ári, frá tæplega 560 þúsund skiptifarþegum árið 2018 niður í 290 þúsund árið 2019.

Í þessari útgáfu skammtímahagvísa ferðaþjónustu eru birtar uppfærðar tölur um gistinætur, tekjur af erlendum ferðamönnum, virðisaukaskattskylda veltu í einkennandi greinum ferðaþjónustu og ferðamenn til landsins í gegnum Keflavíkurflugvöll. Auk þess eru birtar uppfærðar tölur um bílaleigubíla frá Samgöngustofu, umferðatölur frá Vegagerðinni og talningu farþega til landsins samkvæmt talningu Ferðamálastofu auk talna um farþega- og flughreyfingar frá ISAVIA.

Tafla á pdf formi
¹ Aðrar tegundir skráðra gististaða eru tjaldsvæði, farfuglaheimili, orlofshús, skálar í óbyggðum, íbúðagisting, svefnpokagististaðir og heimagististaðir
² Tölur námundaðar að næsta hundraði
³ Skv. gögnum frá Samgöngustofu
⁴ Skv. talningu frá Vegagerðinni í gegnum 14 lykilteljara á hringveginum. Mánaðartölur sýna meðalfjölda talninga á dag í hverjum mánuði. Árstímabil sýnir heildartalningar yfir árið
⁵ Skv. talningu frá Ferðamálastofu
⁶ Áætlaður fjöldi ferðamanna sem gista a.m.k eina nótt
⁷Farþegahreyfingar telja brottfarir, komur og skiptifarþega sem eru tvítaldir

Talnaefni
Hagvísar í ferðaþjónustu
Þjónustujöfnuður
Tekjur af erlendum ferðamönnum
Farþegar og ferðamenn til landsins

Nánari upplýsingar

Deila