Launþegar í einkennandi greinum ferðaþjónustu voru 23.300 í janúar og hefur þeim fækkað um 11% samanborið við janúar 2019. Samdráttur launþega nær til allra atvinnugreina tengdum ferðaþjónustu en mest fækkun var í farþegaflutningi með flugi þar sem launþegum fækkaði um 24%.

Tekjur af erlendum ferðamönnum á 4. ársfjórðungi 2019 lækkuðu um 14%, úr 103 milljörðum króna í 86 milljarða borið saman við sama ársfjórðung 2018. Tekjur af flugi lækkuðu um 8 milljarða, eða 23%, á meðan neysla ferðamanna lækkaði um 6,5 milljarða, eða 9%, á sama tímabili. Sé árið 2019 í heild borið saman við árið 2018 lækkuðu tekjur á milli ára af erlendum ferðamönnum um 10%, eða um 50 milljarða, og er hægt að rekja lunga þeirrar lækkunar til 43 milljarða króna samdráttar í tekjum af flugi á milli ára.

Velta einkennandi greina ferðaþjónustu samkvæmt virðisaukaskattsskýrslum í nóvember og desember 2019 lækkaði um 8% samanborið við sama tímabil árið 2018. Velta í farþegaflutningum með flugi nam rúmum 31 milljarði á tímabilinu sem er 5% minna en í nóvember og desember 2018. Velta gististaða nam rúmum 11,5 milljörðum og dróst saman um 14% samanborið við sama tímabil 2018.

Árið 2019 nam velta í einkennandi greinum ferðaþjónustu 615,5 milljörðum króna samanborið við 682 milljarða árið 2018. Þessa lækkun má að langstærstum hluta rekja til lægri veltu í farþegaflutningum milli landa með flugi sem var 60 milljörðum lægri árið 2019 en árið 2018.

Í þessari útgáfu skammtímahagvísa ferðaþjónustu eru birtar uppfærðar tölur um gistinætur, tekjur af erlendum ferðamönnum, veltu samkvæmt virðisaukaskattsskýrslum og launþega í einkennandi greinum ferðaþjónustu. Auk þess eru birtar uppfærðar tölur um bílaleigubíla frá Samgöngustofu, umferðatölur frá Vegagerðinni, talningu farþega til landsins samkvæmt talningu Ferðamálastofu og tölur um farþega- og flughreyfingar frá ISAVIA.

Taflan á pdf

¹ Aðrar tegundir skráðra gististaða eru tjaldsvæði, farfuglaheimili, orlofshús, skálar í óbyggðum, íbúðagisting, svefnpokagististaðir og heimagististaðir
² Ferðaskrifstofur og skipuleggjendur (erlendis): Þjónusta sem veitt er í sambandi við ferðalög erlendis, þ.e. er undanþegin virðisaukaskatti skv. 12. grein laga um virðisaukaskatt (nr. 50/1988). Ferðaskrifstofur og skipuleggjendur (á Íslandi): Þjónusta sem veitt er í sambandi við ferðalög á Íslandi, þ.e. er ekki undanþegin virðisaukaskatti skv. 12. grein laga um virðisaukaskatt (nr. 50/1988).
³ Tölur námundaðar að næsta hundraði
⁴ Skv. gögnum frá Samgöngustofu
⁵ Skv. talningu frá Vegagerðinni í gegnum 14 lykilteljara á hringveginum. Mánaðartölur sýna meðalfjölda talninga á dag í hverjum mánuði. Árstímabil sýnir heildartalningar yfir árið
⁶ Skv. talningu frá Ferðamálastofu
⁷ Farþegahreyfingar telja brottfarir, komur og skiptifarþega sem eru tvítaldir.

Talnaefni
Hagvísar í ferðaþjónustu
Þjónustujöfnuður
Tekjur af erlendum ferðamönnum

Nánari upplýsingar

Deila