Verulegur samdráttur hefur verið í fjölda farþega um Keflavíkurflugvöll á síðustu mánuðum og í september var enn frekari samdráttur í farþegafjölda. Í september fóru 28.317 farþegar um flugvöllinn sem er samdráttur upp á um 96% samanborið við september 2019 þegar farþegarnir voru 644.303. Á 12 mánuðum hefur samdrátturinn verið um 65%, farið úr 7,9 milljónum farþegum í 2,8 milljónir.

Umferð um þjóðvegi landsins hefur einnig verið að dragast saman. Í september nam samdráttur í umferð um hringveginn um 20-50% í fjórðungum landsins samanborið við september 2019. Mestur var samdrátturinn á Austurlandi, eða um 49%, en minnstur á Vesturlandi eða 19%. Yfir 12 mánaða tímabil hefur samdráttur í umferð verið frá 12 til 24% á landinu.

Í ágúst var fjöldi starfandi samkvæmt skrám í einkennandi greinum ferðaþjónustu um 20 þúsund sem er 36% færri en á sama tíma árið 2019. Á 12 mánaða tímabili frá júlí til ágúst hefur meðalfjöldi starfandi minnkað um 18% samanborið við fyrra 12 mánaða tímabil.

Í ágúst fækkaði gistinóttum á hótelum úr 504 þúsund í 180 þúsund, eða um 64%, auk þess sem framboð hótelherbergja dróst saman um 21% og herbergjanýting minnkaði úr 83% í 36% á milli ára. Séu hótelgistinætur skoðaðar nánar kemur í ljós að 145% aukning varð á gistinóttum greiddum af Íslendingum í ágúst í ár borið saman við sama mánuð í fyrra. Í ágúst voru tæplega 94 þúsund íslenskar gistinætur sem er meira en ágústmánuði 2018 og 2019 samanlagt þegar þær voru um 38 þúsund hvort árið fyrir sig.

Íslendingar voru duglegir að ferðast innanlands í sumar og hafa hótelgistinætur aldrei verið fleiri en síðasta sumar. Maímánuður er þó undanskilinn en þá voru samgöngutakmarkanir ívið strangari en mánuðina á eftir.

Í þessari útgáfu skammtímahagvísa ferðaþjónustu eru birtar uppfærðar tölur um gistinætur, veltu samkvæmt virðisaukaskattskýrslum og fjölda starfandi samkvæmt skrám. Auk þess eru birtar uppfærðar tölur um bílaleigubíla frá Samgöngustofu, umferðartölur frá Vegagerðinni og farþegatalningu Ferðamálastofu auk talna um farþega- og flughreyfingar frá ISAVIA.

Taflan á pdf

¹ Gisting greidd í gegnum vefsíður á borð við Airbnb og óskráðar gistinætur ekki meðtaldar í samtölum yfir 12 mánaða tímabil.
² Aðrar tegundir skráðra gististaða eru tjaldsvæði, farfuglaheimili, orlofshús, skálar í óbyggðum, íbúðagisting, svefnpokagististaðir og heimagististaðir.
³ Ferðaskrifstofur og skipuleggjendur (erlendis): Þjónusta sem veitt er í sambandi við ferðalög erlendis, þ.e. er undanþegin virðisaukaskatti skv. 12. grein laga um virðisaukaskatt (nr. 50/1988). Ferðaskrifstofur og skipuleggjendur (á Íslandi): Þjónusta sem veitt er í sambandi við ferðalög á Íslandi, þ.e. er ekki undanþegin virðisaukaskatti skv. 12. grein laga um virðisaukaskatt (nr. 50/1988).
⁴ Skv. gögnum frá Samgöngustofu.
⁵ Skv. talningu frá Vegagerðinni í gegnum 14 lykilteljara á hringveginum. Mánaðartölur sýna meðalfjölda talninga á dag í hverjum mánuði. Árstímabil sýnir heildartalningar yfir árið.
⁶ Skv. gögnum frá Ferðamálastofu.
⁷ Skv. gögnum frá ISAVIA, farþegahreyfingar telja brottfarir, komur og skiptifarþega sem eru tvítaldir.

Talnaefni
Hagvísar í ferðaþjónustu
Tilraunatölfræði um gistinætur
Starfandi í atvinnugreinum samkvæmt skrám
Tekjur af erlendum ferðamönnum

Nánari upplýsingar

Deila