Velta í farþegaflutningum með flugi var 29% lægri í maí-júní 2019 en á sama tímabili 2018. Á þessu tímabili hættu tvö flugfélög starfsemi, Primera Air í október 2018 og WOW air í mars 2019. Þrátt fyrir mikinn samdrátt í flugi var velta í öðrum einkennandi greinum ferðaþjónustu nánast óbreytt milli ára, en lækkunin var einungis 0,2% frá maí-júní 2018 til sama tímabils 2019.

Launþegum í ferðaþjónustutengdum greinum fækkaði um 9% í júlí síðastliðnum samanborið við sama mánuð síðasta árs. Starfsmönnum fækkaði um 2.900 á þessu tímabili og fækkaði starfsmönnum í öllum flokkum tengdum ferðaþjónustu. Launþegum í farþegaflutningum með flugi fækkaði mest, eða um 19% og nam fækkunin 1.100 starfsmönnum á milli ára.

Gistinætur í júlí voru samtals 1.634 þúsund sem er 2% lækkun frá sama mánuði síðasta árs þegar þær voru 1.674 þúsund. Gisting greidd í gegnum vefsíður, á borð við Airbnb, dróst saman um 5% á sama tíma og fækkaði gistinóttum um 13 þúsund á milli ára. Bíla- og innigisting dróst einnig saman um 21% á milli ára. Á sama tíma fjölgaði gistinóttum á hótelum og gistiheimilum um 2% á milli ára og framboð hótelherbergja jókst um 3%. Nýtingarhlutfall hótelherbergja lækkaði örlítið á sama tímabili, úr 83% niður í 81%.

Í þessari útgáfu skammtímahagvísa ferðaþjónustu eru birtar uppfærðar tölur um gistinætur, ferðamenn til landsins í gegnum Keflavíkurflugvöll, virðisaukaskattskylda veltu og fjölda launþega í einkennandi greinum ferðaþjónustu. Auk þess eru birtar uppfærðar tölur um bílaleigubíla frá Samgöngustofu, umferðatölur frá Vegagerðinni og talningu farþega til landsins samkvæmt talningu Ferðamálastofu auk talna um farþega- og flughreyfingar frá ISAVIA.

Tafla á pdf

1 Aðrar tegundir skráðra gististaða eru tjaldsvæði, farfuglaheimili, orlofshús, skálar í óbyggðum, íbúðagisting, svefnpokagististaðir og heimagististaðir
2 Ferðaskrifstofur og skipuleggjendur (erlendis): Þjónusta sem veitt er í sambandi við ferðalög erlendis, þ.e. er undanþegin virðisaukaskatti skv. 12. grein laga um virðisaukaskatt (nr. 50/1988). Ferðaskrifstofur og skipuleggjendur (á Íslandi): Þjónusta sem veitt er í sambandi við ferðalög á Íslandi, þ.e. er ekki undanþegin virðisaukaskatti skv. 12. grein laga um virðisaukaskatt (nr. 50/1988).
3 Tölur námundaðar að næsta hundraði
4 Skv. gögnum frá Samgöngustofu
5 Skv. talningu frá Vegagerðinni í gegnum 14 lykilteljara á hringveginum. Mánaðartölur sýna meðalfjölda talninga á dag í hverjum mánuði. Árstímabil sýnir heildartalningar yfir árið
6 Skv. talningu frá Ferðamálastofu
7 Áætlaður fjöldi ferðamanna sem gista a.m.k eina nótt
8 Farþegahreyfingar telja brottfarir, komur og skiptifarþega sem eru tvítaldir

Talnaefni
Hagvísar í ferðaþjónustu
Þjónustujöfnuður
Tekjur af erlendum ferðamönnum
Farþegar og ferðamenn til landsins

Nánari upplýsingar

Deila