Vinsamlegast athugið að þessari fréttatilkynningu var breytt 14. júní 2019 15:00 frá upprunalegri útgáfu þar sem arðgreiðslur voru vanáætlaðar.
Áætlað er að tekjuafkoma hins opinbera hafi verið neikvæð um 3,4 milljarða króna á 1. ársfjórðungi 2019 eða sem nemur 0,5% af vergri landsframleiðslu ársfjórðungsins. Í heild er áætlað að tekjur hins opinbera hafi dregist saman um 2,4% frá 1. fjórðungi 2018. Samdrátturinn skýrist aðallega af lægri arðgreiðslum fjármálafyrirtækja en á 1. ársfjórðungi 2018 var tekjufærður arður upp á 21,5 milljarða króna samanborið við tæpa 5,7 milljarða króna á 1. ársfjórðungi 2019. Áætlað er að heildarútgjöld hafi aukist um 8,1% á 1. ársfjórðungi 2019 frá sama tímabili fyrra árs. Launakostnaður vegur þar þyngst en hann er áætlaður 34,4% af heildarútgjöldum hins opinbera.
| Fjárhagur hins opinbera á 1. ársfjórðungi | |||
| 2018 | 2019 | Breyting | |
| Verðlag hvers árs, milljarðar króna | 1. ársfj. | 1. ársfj. | % |
| Heildartekjur | 295,1 | 287,9 | -2,4 |
| Heildarútgjöld | 269,6 | 291,4 | 8,1 |
| Fjárfesting | 16,5 | 17,6 | 6,4 |
| Tekjujöfnuður | 25,4 | -3,4 | . |
| Tekjujöfnuður % af tekjum | 8,6 | -1,2 | . |
| Tekjujöf. % af VLF ársfjórðungs | 3,9 | -0,5 | . |
