Hagstofan birtir nú öðru sinni samandregið talnaefni yfir fjármál ríkis og sveitarfélaga á rekstrargrunni eftir ársfjórðungum. Að þessu sinni nær talnaefnið yfir 1. og 2. ársfjórðung 2004. Sambærilegt efni verður framvegis birt ársfjórðungslega í lok næsta ársfjórðungs eftir að viðkomandi fjórðungi lýkur. Talnaefni þetta er meðal annars unnið vegna þeirra alþjóðlegu skuldbindinga sem íslensk stjórnvöld hafa tekið á sig í tengslum við EES-samninginn, en það mun þó enn frekar koma innlendum stjórnvöldum að gagni við mat á hagþróun innan ársins. Þá mun þetta nýja efni nýtast Hagstofunni við gerð ársfjórðungslegra þjóðhagsreikninga.
     Efnið er tvískipt. Annars vegar er efni frá Fjársýslu ríkisins um tekjur og gjöld ríkissjóðs á 2. fjórðungi ársins og hins vegar er áætlað heildaryfirlit yfir tekjur og gjöld allra sveitarfélaga í landinu á sama tíma. Tölurnar frá sveitarfélögunum byggja á úrtaki 7 sveitarfélaga með 50% íbúafjöldans og hefur það úrtak verið fært upp til heildar. Enn sem komið er hefur ekki reynst unnt að birta mikla sundurliðun á efninu og takmarkast birtingin við rekstrartekjur, rekstrargjöld og tekjujöfnuð auk þess sem fjárfesting er sýnd sérstaklega. Áfram verður unnið að því í samvinnu við Fjársýsluna og sveitarfélögin að koma þessari skýrslusöfnun í fastan farveg.
     Á 2. ársfjórðungi 2004 reyndust heildartekjur ríkissjóðs vera rúmir 67 milljarðar króna og tekjujöfnuður neikvæður um 4,1 milljarð króna. Tekjur sveitarfélaganna voru rúmir 20 milljarðar og tekjujöfnuður neikvæður um 1,2 milljarða. Tekjujöfnuður hins opinbera í heild varð því neikvæður um 5,3 milljarða króna eða 6,1% af tekjum þeirra. Sem hlutfall af landsframleiðslu ársins varð hallinn 0,6% hjá hinu opinbera í heild. 

     Í þessum tölum hefur verið leitast við að skrá bæði tekjur og gjöld á rekstrargrunni, ekki á greiðslugrunni eins og mánaðaryfirlit ríkissjóðs sýna. Rekstrargrunnur felur í sér að skuldbindingar eru bókfærðar þegar til þeirra er stofnað, óháð því hvenær greiðslur fara fram. Þetta eru bráðabirgðatölur, bæði hjá ríki og sveitarfélögum. Sérstaklega eru tölur um fjárfestingu sveitarfélaganna óvissu háðar.
     Á grundvelli þess efnis sem nú birtist um 2. ársfjórðung og fyrri talna um 1. ársfjórðung, sem hafa verið leiðréttar, fæst mynd af fjárhag hins opinbera á fyrri helmingi ársins 2004.

     Samkvæmt þessu varð tekjujöfnuður hins opinbera neikvæður um 8,3 milljarða á fyrri helmingi ársins eða 0,9% af landsframleiðslu ársins. Sem hlutfall af tekjum varð tekjujöfnuður sveitarfélaganna talsvert lakari en ríkissjóðs.
     Árshlutatölurnar fyrir 1. og 2. ársfjórðung sem hér hefur verið lýst byggja að mestu á uppgjörsaðferðum ríkis- og sveitarfélaga. Þessar tölur eru því ekki fyllilega sambærilegar við þær árstölur sem Hagstofan birtir en þar er fylgt skilgreiningum þjóðhagsreikninga við mat á tekjum og gjöldum. Engu að síður ættu árshlutatölurnar að gefa skjótfengna mynd af þróun afkomunnar innan ársins og notagildi þeirra vex eftir því sem vitneskja liggur fyrir um fleiri árshluta.