Áætlað er að tekjuafkoma hins opinbera hafi verið neikvæð um 24,0 milljarða króna á öðrum ársfjórðungi 2025 eða sem nemur 2,0% af vergri landsframleiðslu ársfjórðungsins. Til samanburðar nam hallinn á öðrum ársfjórðungi 2024 5,8% af vergri landsframleiðslu þess ársfjórðungs.
Afkoma hins opinbera er áætluð út frá bráðabirgðatölum. Niðurstöður munu taka breytingum þegar uppgjör liggur fyrir.
Í heild er áætlað að tekjur hins opinbera hafi aukist um 7,8% frá öðrum ársfjórðungi 2025. Vegur þyngst auknar tekjur vegna skatta á tekjur og hagnað, sem áætlað er að hafi aukist um 10,7% frá sama tímabili fyrra árs, ásamt auknum tekjum vegna skatta á vöru og þjónustu sem jukust um 6,7%.
Gert er ráð fyrir að heildarútgjöld hafi lækkað um 0,9% á öðrum ársfjórðungi 2025 frá sama tímabili fyrra árs, en töluverð útgjöld á öðrum ársfjórðungi 2024 voru vegna jarðhræringa og eldgosa við Grindavík. Samneysluútgjöld hins opinbera halda áfram að aukast en áætlað er að launakostnaður hafi aukist um 12.1% og útgjöld vegna kaupa á vöru og þjónustu um 6,0%. Einnig er töluverð aukning í félagslegum tilfærslum til heimila, en bráðabirgðagögn benda til þess að þær hafi aukist um 10,8%.
Vert er að hafa í huga að afmörkun hins opinbera í þjóðhagsreikningum og í talnaefni um fjármál hins opinbera miðast við evrópska þjóðhagsreikningastaðalinn (ESA2010). Með hinu opinbera teljast meðal annars lánasjóðir ríkissjóðs sem hafa veruleg áhrif á vaxtatekjur og gjöld þess. Í greinagerð sem gefin var út 30. nóvember 2020 og er aðgengileg á vef Hagstofunnar er fjallað sérstaklega um aðferðafræðilegan grundvöll geiraflokkunar og úrlausn álitamála er snúa að flokkun fyrirtækja og stofnana í eigu ríkisins.