Áætlað er að tekjuafkoma hins opinbera hafi verið neikvæð um 14,8 milljarða króna á þriðja ársfjórðungi 2025 eða sem nemur 1,2% af vergri landsframleiðslu ársfjórðungsins. Til samanburðar nam hallinn á þriðja ársfjórðungi 2024 4,5% af vergri landsframleiðslu þess ársfjórðungs.
Í heild er áætlað að tekjur hins opinbera hafi aukist um 7,5% á verðlagi hvers árs samanborið við þriðja ársfjórðung 2024. Tekjur af sköttum og tryggingagjaldi jukust um 8,4%.
Áætlað er að heildarútgjöld hafi dregist saman um 0,4% á þriðja ársfjórðungi 2025 miðað við sama tímabil 2024. Útgjöld vegna launakostnaðar og kaupa á vöru og þjónustu héldu áfram að aukast á verðlagi hvers árs. Töluvert dró úr öðrum tilfærslum sem voru óvenju háar á árinu 2024 vegna jarðhræringa og eldgosa við Grindavík. Bráðabirgðagögn benda til þess að einnig hafi dregið úr greiddum vaxtagjöldum og fjárfestingu hins opinbera. Búast má við að niðurstöður taki breytingum þegar uppgjör liggur fyrir.
Vert er að hafa í huga að afmörkun hins opinbera í þjóðhagsreikningum og í talnaefni um fjármál hins opinbera miðast við evrópska þjóðhagsreikningastaðalinn (ESA2010). Með hinu opinbera teljast meðal annars lánasjóðir ríkissjóðs sem hafa veruleg áhrif á vaxtatekjur og gjöld þess. Í greinargerð sem gefin var út 30. nóvember 2020 og aðgengileg er á vef Hagstofunnar er fjallað sérstaklega um aðferðafræðilegan grundvöll geiraflokkunar og úrlausn álitamála er snúa að flokkun fyrirtækja og stofnana í eigu ríkisins.