Út eru komin Hagtíðindi í efnisflokknum þjóðhagsreikningar um útgjöld til fræðslumála á Íslandi, Útgjöldum til málaflokksins frá 1980 til 2007 er lýst í fjárhæðum, hlutfallstölum og raunstærðum en ítarlegri upplýsingar um málaflokkinn er að finna á vefsíðu Hagstofunnar.
Árið 2007 námu heildarútgjöld til fræðslumála 106,4 milljörðum króna eða 8,2% af landsframleiðslu. Þar af var hlutur hins opinbera 96,3 milljarðar króna en hlutur einkaaðila 10,1 milljarður eða 9,5% af útgjöldunum. Af heildarútgjöldum hins opinbera árið 2007 runnu 18,8% til fræðslumála. Sem hlutfall af landsframleiðslu hafa heildarútgjöld til fræðslumála hækkað úr ríflega 7,1% af landsframleiðslu 1998 í rúmlega 8,2% á árinu 2007 eins og áður segir.
Af heildarútgjöldum til fræðslumála árið 2007 runnu um 11,4% til fræðsluhluta leikskólans, 45,1% til grunnskólans, 17,9% til framhaldsskóla, 18,4% til háskólastigsins og 7,3% til stjórnsýslu menntamála og þátta sem ekki tilheyra ákveðnu skólastigi. Af útgjöldum hins opinbera til fræðslumála árið 2007 runnu um 9,1% til leikskólastigsins, 49,2% til grunnskólans, 17,6% til framhaldsskólans, 18,9% til háskólastigsins og 5,2% voru útgjöld sem tilheyra ekki ákveðnu skólastigi.
Af útgjöldum einkageirans til fræðslumála árið 2007 runnu um 32,7% til leikskólastigsins, 5,2% til grunnskólastigsins, 20,0% til framhaldsskólastigsins, 13,8% til háskólastigsins og 28,0% til annarra fræðslumála, óflokkuð á skólastig.
Heildarútgjöld til fræðslumála í aðildarríkjum Efnahags- og framfarastofnunarinnar (OECD) voru að meðaltali 5,7% af landsframleiðslu ríkjanna árið 2005 en mikill munur er á því hlutfalli milli einstakra ríkja. Í Ísrael var hlutfallið hæst eða 8,3% árið 2005 en 3,4% í Grikklandi það ár. Á þennan mælikvarða litið var Ísland í 2. sæti OECD-ríkjanna en hér runnu 8% af landsframleiðslu til fræðslumála á árinu 2005.
Útgjöld til fræðslumála á Íslandi - Hagtíðindi