Gistinóttum á hótelum fækkaði um 7,0% í janúar 2026 samkvæmt bráðabirgðatölum Hagstofu Íslands um ferðaþjónustu á Íslandi. Alls voru gistinæturnar tæplega 274.000 á landsvísu en til samanburðar voru þær tæplega 294.000 á sama tíma árið 2025. Fækkun gistinátta má nær alfarið rekja til samdráttar á höfuðborgarsvæðinu en þar fækkaði gistinóttum um 10,8% eða tæplega 20.500. Á Austurlandi var einnig hlutfallslega mikil fækkun eða 29,7% auk þess sem 18,3% fækkun var á Vesturlandi og Vestfjörðum. Á Norðurlandi fjölgaði gistinóttum um 10,3% en minni breytingar voru á Suðurlandi (1,2%) og Suðurnesjum (2,0%).
Gistinætur erlendra ferðamanna voru um 245.000, eða 90% af gistinóttum hótela, og var það 4,3% fækkun frá fyrra ári. Gistinætur Íslendinga á hótelum voru rúmlega 28.000 sem var 25,1% minna en í janúar árið 2025. Flestar erlendar gistinætur tilheyrðu Bretum eða tæpar 62 þúsund og fækkaði þeim um 1,1% á milli ára. Þá fækkaði einnig gistinóttum Bandaríkjamanna (49 þúsund) um 21,8% og Kínverja (25 þúsund) um 9,1%.
Framboð hótelherbergja jókst um 1,0% á landinu í janúar. Mest jókst framboð herbergja hlutfallslega á Austurlandi eða um 23,9%. Þá var einnig 14,0% aukning á Suðurlandi. Í öðrum landshlutum var fækkun þar sem helst má nefna 13,2% fækkun á Norðurlandi. Á Suðurnesjum fækkaði herbergjum um 5,1% og 2,0% á höfuðborgarsvæðinu. Nær óbreyttur fjöldi var á Vesturlandi og Vestfjörðum (-0,1%). Alls voru 165 hótel starfandi í janúar 2026 með 11.599 herbergi og var fjöldinn aðeins meiri en á sama tíma árið 2025 þegar alls voru starfandi 161 hótel. Á höfuðborgarsvæðinu voru rekin 57 hótel með alls 5.442 herbergi og 50 á Suðurlandi með 3.026 herbergi.
Herbergjanýting dróst saman um 4,1 prósentustig á landinu í heild. Mest minnkaði nýtingin á Austurlandi (-6,5 prósentustig) og höfuðborgarsvæðinu (-6,1 prósentustig). Þá var einnig 4,9 prósentustiga minnkun á Suðurlandi og 3,7 prósentustiga minnkun á Vesturlandi og Vestfjörðum. Á Suðurnesjum batnaði nýtingin um 3,5 prósentustig auk þess sem 3,3 prósentustiga aukning var á Norðurlandi. Í janúar var mesta nýtingin á höfuðborgarsvæðinu (56,1%) og því næst á Suðurnesjum (49,9%).
Allir gististaðir
Þegar allir skráðir gististaðir (hótel, gistiheimili, tjaldsvæði, orlofshús, o.fl.) eru skoðaðir var áætlaður heildarfjöldi gistinátta í janúar rúmlega 359.000. Þetta var 10,4% fækkun miðað við sama tíma árið 2025 en þá var heildarfjöldi gistinátta á öllum gististöðum tæplega 401.000. Meginþorri gistinátta var á hótelum og gistiheimilum eða um 295.000 (274.000 á hótelum og 21.000 á gistiheimilum) en tæplega 65.000 á öðrum tegundum skráðra gististaða (tjaldsvæðum, orlofshúsum, o.s.frv.).
Lýsigögn
Tölur um gistinætur fyrir skráða gististaði eru fengnar úr gistináttagrunni Hagstofu Íslands. Lýsigögn um fjölda gististaða, gesta og gistinátta má nálgast á vef Hagstofunnar.
Gögn sem fást frá gististöðum geta innihaldið tölur um fjölda gistinátta af óþekktum þjóðernum og er þeim tölum dreift með hlutfallslegum hætti á þekkt þjóðerni hverju sinni.
Allar tölur fyrir 2025 og 2026 eru bráðabirgðatölur nema tölur um gistinætur hótela þar sem bráðabirgðatölur eru fyrir janúar 2026.