Árið 2017 hófu 3.570 fyrirtæki starfsemi í viðskiptahagkerfinu. Með fyrirtækjum er bæði átt við lögaðila og einstaklinga sem hefja rekstur á eigin kennitölu. Fjöldi starfsmanna hjá fyrirtækjum sem hófu starfsemi árið 2017 var ríflega 4.000 og námu rekstrartekjur þessara fyrirtækja tæpum 45,6 milljörðum á fyrsta starfsári. Fyrirtækjum sem hófu starfsemi fækkaði um 15% frá árinu 2016 sem var metár en þá hófu 4.205 fyrirtæki starfsemi. Rekstrartekjur lækkuðu um 15% milli ára og fjöldi starfsmanna um 25%.

Fæðingartíðni fyrirtækja, af heildarfjölda virkra fyrirtækja, var hæst árið 2016. Fæðingartíðni fyrirtækja er nokkuð mismunandi eftir atvinnugreinum en undanfarin ár hefur fæðingartíðni verið hæst í einkennandi greinum ferðaþjónstu eða á bilinu 12–18%.

Árið 2017 hófu flest ný fyrirtæki rekstur í byggingarstarfsemi og mannvirkjagerð, alls 627 fyrirtæki sem voru með 716 starfsmenn og samanlagðar rekstrartekjur upp á 9,35 milljarða. Mestar rekstrartekjur árið 2017 voru hjá fyrirtækjum sem hófu rekstur í heild- og smásöluverslun, eða 16,21 milljarðar hjá 394 fyrirtækjum með 720 starfsmenn. Flestir starfsmenn árið 2017 voru hjá fyrirtækjum sem hófu starfsemi í einkennandi greinum ferðaþjónustu, alls 740 starfsmenn hjá 524 fyrirtækjum sem voru með ríflega 4 milljarða í rekstrartekjur. Þrátt fyrir það var samdráttur milli ára í einkennandi greinum ferðaþjónustu en árið 2016 hófu þar 626 fyrirtæki starfsemi sem voru með með ríflega 1300 starfsmenn og 8,66 milljarða í rekstrartekjur.

Tölfræði um lýðfræði fyrirtækja byggir á samræmdri aðferðafræði Eurostat og OECD og er því samanburðarhæf við fyrirtækjatölfræði í öðrum löndum Evrópu. Tölfræðin byggir á rekstrarframtölum fyrirtækja og einstaklinga. Hún nær til einkageirans utan landbúnaðar, fjármála- og vátryggingastarfsemi. Undanskilin er opinber stjórnsýsla, heilbrigðis- og félagsþjónusta, fræðslustarfsemi, menningar-, íþrótta- og tómstundastarfsemi ásamt starfsemi félagasamtaka.

Fyrirtæki teljast virk þegar þau hafa rekstrartekjur eða launakostnað. Þegar rekstur fyrirtækis færist á milli kennitalna telst það ekki vera nýtt fyrirtæki nema tvö af þremur eftirfarandi skilyrðum séu uppfyllt; reksturinn sé í annarri atvinnugrein skv. ÍSAT2008, reksturinn fari fram á annarri starfsstöð eða skipt hafi verið um starfsfólk að megninu til. Einnig eru gerðar leiðréttingar tengt samruna fyrirtækja og skiptingu.

Upphæðir eru á verðlagi hvers árs.

¹Farþegaflutningar; Veitinga- og gistiþjónusta; Leiga á vélknúnum ökutækjum; Leiga á tómstunda- og íþróttavörum; Ferðaskrifstofur, ferðaskipuleggjendur og önnur bókunarþjónusta.
²Framleiðsla á efnum og efnavörum; Vopna- og skotfæraframleiðsla; Framleiðsla á tölvu-, rafeinda- og optískum vörum; Framleiðsla á rafbúnaði og heimilistækjum; Framleiðsla á öðrum ótöldum vélum og tækjum; Framleiðsla á vélknúnum ökutækjum og tengivögnum; Framleiðsla annarra farartækja; Framleiðsla á tækjum og vörum til lækninga og tannlækninga; Póst- og boðberaþjónusta; Útgáfustarfsemi; Útvarps- og sjónvarpsútsending; dagskrárgerð; Fjarskipti; Þjónustustarfsemi á sviði upplýsingatækni; Starfsemi á sviði upplýsingaþjónustu; Vísindarannsóknir og þróunarstarf.

Lýsigögn

Talnaefni

• Deildu fréttinni á Facebook
• Deildu fréttinni á Twitter
• Sendu fréttina með póst