Nýskráningar einkahlutafélaga í ágúst 2016 voru 191. Síðustu 12 mánuði, frá september 2015 til ágúst 2016, hefur nýskráningum einkahlutafélaga fjölgað um 17% í samanburði við 12 mánuði þar á undan. Alls voru 2.649 ný einkahlutafélög skráð á tímabilinu, borið saman við 2.259 á fyrri 12 mánuðum. Hlutfallsleg fjölgun nýskráninga var mest í leigustarfsemi og ýmissi sérhæfðri þjónustu þar sem þeim fjölgaði úr 165 í 245, eða um 48% á síðustu 12 mánuðum. Meðal annarra greina þar sem nýskráningum hefur fjölgað má nefna fasteignaviðskipti þar sem nýskráningum fjölgaði úr 299 í 415 (39%) og flutninga og geymslu þar sem fjölgunin var úr 44 í 61 nýskráningu (39%). Nýskráningum fækkaði hins vegar í heild- og smásöluverslun og viðgerðum á vélknúnum ökutækjum um 4% frá fyrra tímabili (úr 281 í 270).

Í ágúst 2016 voru 14 fyrirtæki tekin til gjaldþrotaskipta. Gjaldþrotum fyrirtækja síðustu 12 mánuði, frá september 2015 til ágúst 2016, hefur fjölgað um 19% í samanburði við 12 mánuði þar á undan. Alls voru 867 fyrirtæki tekin til gjaldþrotaskipta á tímabilinu, borið saman við 729 á fyrra tímabili. Á síðasta 12 mánaða tímabili hefur gjaldþrotum fjölgað hlutfallslega mest í heild- og smásöluverslun og viðgerðum á vélknúnum ökutækjum, þar sem þeim fjölgaði úr 124 í 183 frá fyrra tímabili (48%). Hlutfallslega fækkaði gjaldþrotum mest í fasteignaviðskiptum, úr 89 í 77 (13%).

Talnaefni