Nýskráningar einkahlutafélaga í febrúar 2017 voru 257. Síðustu 12 mánuði, frá mars 2016 til febrúar 2017, hefur nýskráningum einkahlutafélaga fjölgað um 12% í samanburði við 12 mánuði þar á undan. Alls voru 2.714 ný einkahlutafélög skráð á tímabilinu, borið saman við 2.430 á fyrri 12 mánuðum. Hlutfallsleg fjölgun nýskráninga var mest í leigustarfsemi og ýmissi sérhæfðri þjónustu, þar sem þeim fjölgaði úr 185 í 281 á síðustu 12 mánuðum (52%), og í flutningum og geymslu, þar sem fjölgunin var úr 45 í 66 nýskráningar (47%). Í landbúnaði, skógrækt og fiskveiðum fækkaði nýskráningum á tímabilinu úr 92 í 81 (12%).

Í febrúar 2017 voru 67 fyrirtæki tekin til gjaldþrotaskipta. Gjaldþrotabeiðnum fyrirtækja síðustu 12 mánuði, frá mars 2016 til febrúar 2017, hefur fjölgað um 55% í samanburði við 12 mánuði þar á undan. Alls voru 974 fyrirtæki tekin til gjaldþrotaskipta á tímabilinu, borið saman við 630 á fyrra tímabili. Á síðasta 12 mánaða tímabili hefur gjaldþrotum fjölgað hlutfallslega mest í leigustarfsemi og ýmissi sérhæfðri þjónustu, þar sem þeim fjölgaði úr 30 í 59 frá fyrra tímabili (97%). Gjaldþrotum fjölgaði í öllum helstu atvinnugreinabálkum frá fyrra tímabili, en þeim fjölgaði hvað hægast í framleiðslu, úr 40 í 51 (28%).

Frá og með næstu birtingu mun Hagstofa Íslands birta fréttatilkynningar um fjölda nýskráninga og gjaldþrota ársfjórðungslega, í stað mánaðarlega áður. Veftöflur um nýskráningar og gjaldþrot eftir bálkum atvinnugreina verða uppfærðar mánaðarlega, eins og áður. 

Talnaefni:
  Fyrirtæki
  Gjaldþrot