Nýskráningar einkahlutafélaga í mars 2016 voru 261. Síðustu 12 mánuði, frá apríl 2015 til mars 2016, hefur nýskráningum einkahlutafélaga fjölgað um 14% í samanburði við 12 mánuði þar á undan. Alls voru 2.465 ný einkahlutafélög skráð á tímabilinu, borið saman við 2.161 á fyrri 12 mánuðum. Hlutfallsleg fjölgun nýskráninga var mest í fasteignaviðskiptum þar sem þeim fjölgar úr 230 í 394, eða um 71% á síðustu 12 mánuðum. Meðal annarra greina þar sem nýskráningum hefur fjölgað má nefna leigustarfsemi og ýmsa sérhæfða þjónustu þar sem nýskráningum fjölgaði úr 157 í 204 (30%) og rekstur gististaða og veitingarekstur þar sem fjölgunin var úr 142 í 172 nýskráningar (21%). Mest hlutfallsleg fækkun nýskráninga síðustu 12 mánuði var í heild- og smásöluverslun og viðgerðum á vélknúnum ökutækjum, eða um 7% frá fyrra tímabili (úr 285 í 266).

Skráð gjaldþrot í mars 2016 voru 120. Gjaldþrotum fyrirtækja síðustu 12 mánuði, frá apríl 2015 til mars 2016, hefur fækkað um 15% í samanburði við 12 mánuði þar á undan. Alls voru 673 fyrirtæki tekin til gjaldþrotaskipta á tímabilinu, borið saman við 792 á fyrra tímabili. Hlutfallslega fækkaði gjaldþrotum mest í fasteignaviðskiptum, úr 95 í 62 (35%). Einnig má nefna fækkun gjaldþrota í rekstri gististaða og veitingarekstri úr 66 í 45 (32%), auk þess að í landbúnaði, skógrækt og fiskveiðum fækkaði gjaldþrotum úr 26 í 18 (31%). Gjaldþrotum fækkaði frá fyrri 12 mánuðum í öllum helstu atvinnugreinabálkum nema í leigustarfsemi og ýmissi sérhæfðri þjónustu, þar sem þeim fjölgaði um 6% frá fyrra tímabili (úr 34 í 36).

Talnaefni