Nýskráningar einkahlutafélaga í nóvember 2016 voru 222. Síðustu 12 mánuði, frá desember 2015 til nóvember 2016, hefur nýskráningum einkahlutafélaga fjölgað um 15% í samanburði við 12 mánuði þar á undan. Alls voru 2.688 ný einkahlutafélög skráð á tímabilinu, borið saman við 2.328 á fyrri 12 mánuðum. Hlutfallsleg fjölgun nýskráninga var mest í leigustarfsemi og ýmissi sérhæfðri þjónustu, þar sem þeim fjölgaði úr 163 í 274, eða um 68% á síðustu 12 mánuðum. Meðal annarra greina þar sem nýskráningum hefur fjölgað má nefna flutninga og geymslu þar sem fjölgunin var úr 45 í 61 nýskráningar (36%) og byggingarstarfsemi og mannvirkjagerð þar sem þeim fjölgaði úr 278 í 355 (28%). Nýskráningum fækkaði í heild- og smásöluverslun og viðgerðum á vélknúnum ökutækjum um 4% frá fyrra tímabili (úr 282 í 271).

Í nóvember 2016 voru 100 fyrirtæki tekin til gjaldþrotaskipta. Gjaldþrotum fyrirtækja síðustu 12 mánuði, frá desember 2015 til nóvember 2016, hefur fjölgað um 63% í samanburði við 12 mánuði þar á undan. Alls voru 1.010 fyrirtæki tekin til gjaldþrotaskipta á tímabilinu, borið saman við 618 á fyrra tímabili. Á síðasta 12 mánaða tímabili hefur gjaldþrotum fjölgað hlutfallslega mest í fjármála- og vátryggingastarfsemi, þar sem þeim fjölgaði úr 33 í 91 frá fyrra tímabili (176%). Einnig má nefna að gjaldþrotum fjölgaði frá fyrra tímabili úr 46 í 97 í sérfræðilegri, vísindalegri og tæknilegri starfsemi (111%), í upplýsingum og fjarskiptum fjölgaði gjaldþrotum úr 32 í 63 (97%), auk þess sem þeim fjölgaði úr 103 í 202 í heild- og smásöluverslun og viðgerðum á vélknúnum ökutækjum (96%). Gjaldþrotum fjölgaði í öllum helstu atvinnugreinabálkum frá fyrra tímabili, en þeim fjölgaði hvað hægast í flutningum og geymslu, úr 20 í 22 (10%).

Talnaefni:
  Fyrirtæki
  Gjaldþrot