Nýskráningar einkahlutafélaga í október 2016 voru 168. Síðustu 12 mánuði, frá nóvember 2015 til október 2016, hefur nýskráningum einkahlutafélaga fjölgað um 18% í samanburði við 12 mánuði þar á undan. Alls voru 2.679 ný einkahlutafélög skráð á tímabilinu, borið saman við 2.263 á fyrri 12 mánuðum. Hlutfallsleg fjölgun nýskráninga var mest í leigustarfsemi og ýmissi sérhæfðri þjónustu, þar sem þeim fjölgaði úr 162 í 262, eða um 62% á síðustu 12 mánuðum. Meðal annarra greina þar sem nýskráningum hefur fjölgað má nefna flutninga og geymslu þar sem fjölgunin var úr 42 í 62 nýskráningar (48%) og byggingarstarfsemi og mannvirkjagerð þar sem þeim fjölgaði úr 266 í 361 (36%). Nýskráningum fækkaði í heild- og smásöluverslun og viðgerðum á vélknúnum ökutækjum um 5% frá fyrra tímabili (úr 284 í 269).

Í október 2016 voru 98 fyrirtæki tekin til gjaldþrotaskipta. Gjaldþrotum fyrirtækja síðustu 12 mánuði, frá nóvember 2015 til október 2016, hefur fjölgað um 41% í samanburði við 12 mánuði þar á undan. Alls voru 940 fyrirtæki tekin til gjaldþrotaskipta á tímabilinu, borið saman við 666 á fyrra tímabili. Á síðasta 12 mánaða tímabili hefur gjaldþrotum fjölgað hlutfallslega mest í fjármála- og vátryggingastarfsemi, þar sem þeim fjölgaði úr 39 í 79 frá fyrra tímabili (103%). Einnig hefur verið nokkur fjölgun gjaldþrota í upplýsingum og fjarskiptum, úr 31 í 58 frá fyrra tímabili (87%); í heild- og smásöluverslun og viðgerðum á vélknúnum ökutækjum fjölgaði gjaldþrotum úr 109 í 195 (79%), auk þess sem þeim fjölgaði úr 54 í 88 í sérfræðilegri, vísindalegri og tæknilegri starfsemi (63%). Enginn atvinnugreinabálkur sýndi veruleg merki fækkunar gjaldþrota frá fyrra tímabili, en fjöldi gjaldþrota stóð nánast í stað í rekstri gististaða og veitingarekstri, fór úr 55 í 54 (2% fækkun) og í landbúnaði, skógrækt og fiskveiðum (26 gjaldþrot skráð fyrir hvort tímabil).

Talnaefni:
  Nýskráningar
  Gjaldþrot