Velta jókst í flestum af helstu atvinnugreinum landsins í mars og apríl 2026 samanborið við sömu mánuði árið 2025. Mest jókst velta í upplýsingatækni og sjávarútvegi og fiskeldi. Aftur á móti var samdráttur í bílasölu, framleiðslu málma og einkennandi greinum ferðaþjónustu. Velta jókst umfram verðbólgu í um helmingi atvinnugreina en vísitala neysluverðs hækkaði um 5,3% á tímabilinu.
Velta í tækni- og hugverkaiðnaði (án lyfjaframleiðslu) var tæplega 120 milljarðar króna í mars og apríl sem var um 12% meira en á sama tíma árið 2025. Verulegur vöxtur var í upplýsingatæknigreinum og þá einkum í starfsemi tengdri gagnaverum. Þannig jókst velta hlutfallslega mest í starfsemi á sviði upplýsingaþjónustu (gagnavinnslu, hýsingu, o.fl.) eða um 176%. Þá var einnig tæplega 15% vöxtur í hugbúnaðargerð og 11% í þjónustustarfsemi á sviði upplýsingatækni. Í meðal- og hátækniframleiðslu dróst velta saman um 6% og þar af um tæplega 16% í framleiðslu á tölvu-, rafeinda- og optískum vörum.
Í einkennandi greinum ferðaþjónustu dróst velta saman um tæp 7% og mældist rúmlega 130 milljarðar króna. Megin ástæðan var samdráttur í farþegaflutningum með flugi (-10%) og hjá ferðaskrifstofum um tæplega 17% (þar af var um 36% samdráttur í þjónustu tengdri ferðum erlendis en 10% í þjónustu tengdri ferðum innanlands). Rúmlega 7% samdráttur var í bílaleigu (leigu á tómstundavörum, íþróttavörum og vélknúnum ökutækjum). Þá mældist velta einnig tæplega 1% minni í veitingasölu og -þjónustu auk þess sem aðeins um 1% vöxtur var í rekstri gististaða. Meiri vöxtur var í farþegaflutningum á landi (14%) og á sjó, vötnum og ám (19%).
Velta í smásöluverslun var töluverð og jókst um tæp 8%. Þar af var tæplega 18% aukning hjá stórmörkuðum og matvöruverslunum auk þess sem um 10% vöxtur var í lyfjaverslun. Aftur á móti dróst velta saman um tæp 7% hjá bæði byggingarvöruverslunum og sérverslunum með fatnað og skó. Í heildverslun jókst velta svo um rúm 6%. Í sölu, viðgerðum og viðhaldi á vélknúnum ökutækjum dróst velta saman um 13% þar sem um 21% samdráttur var í bílasölu.
Velta í fasteignastarfsemi var lítið breytt og jókst um rúmlega 1% í rúmlega 29 milljarða króna. Litlar breytingar voru einnig í byggingarstarfsemi og mannvirkjagerð þar sem velta í byggingu húsnæðis og þróun byggingarverkefna minnkaði um rúm 4%. Í sérhæfðri byggingarstarfsemi var hins vegar vöxtur um 6% auk þess sem velta í mannvirkjagerð jókst um rúm 5%.
Misjöfn þróun var í öðrum helstu útflutningsgreinunum. Í sjávarútvegi og fiskeldi var mikill vöxtur þar sem velta jókst um tæplega 27%. Þar af var um 22% aukning á veltu í sjávarútvegi og 89% í fiskeldi. Í framleiðslu málma gegndi hins vegar öðru máli þar sem velta dróst saman um tæplega 12%. Heimsmarkaðsverð á áli hækkaði mikið á tímabilinu en hins vegar dróst útflutt magn saman um þriðjung auk þess sem gengi krónunnar styrktist lítillega.
Um gögnin
Tölur um veltu skv. virðisaukaskattsskýrslum eru bráðabirgðatölur. Allar tölur eru á nafnvirði nema annað sé tekið fram. Verðbólga fyrir tímabilið mars-apríl 2025 til mars-apríl 2026 var 5,3% miðað við meðalgengi vísitölu neysluverðs.
Rannsókn stendur yfir á grunngögnum um framleiðslu á lyfjum og efnum til lyfjagerðar. Að svo stöddu er því ekki unnt að birta tölur fyrir þá atvinnugrein. Þar að auki verða tölur fyrir tækni- og hugverkaiðnað, meðal- og hátækniframleiðslu og heildarveltu (alls og alls án landbúnaðar og skógræktar) birtar án veltu í lyfjaframleiðslu á meðan frekari skoðun á gögnunum fer fram. Þetta gildir um öll gögn frá núverandi tímabili aftur til ársins 2008.
Við birtingu síðustu fréttar í apríl sl. var velta í virðisaukaskattskyldri starfsemi (án landbúnaðar og lyfjaframleiðslu) talin hafa verið 1.096,0 milljarðar króna (0,1% lækkun miðað við fyrra ár) á tímabilinu janúar-febrúar 2026. Nú hafa nýrri tölur borist og er velta á þessu tímabili talin hafa verið 1.101,0 milljarðar króna (0,3% hækkun miðað við fyrra ár).
Talnaefni
Velta í öllum atvinnugreinum
Velta í einkennandi greinum ferðaþjónustu
Lýsigögn
Atvinnugreinaflokkun