Hagstofa Íslands hefur gefið út Hagtíðindi þar sem greint er frá niðurstöðum kosninga til Alþingis sem fram fóru 12. maí 2007. Við kosningarnar voru alls 221.330 á kjörskrá, eða 71,1% landsmanna. Af þeim greiddu 185.071 atkvæði, eða 83,6% kjósenda. Kosningaþátttaka kvenna var meiri en karla, eða 83,9% á móti 83,3% hjá körlum.
Í kosningunum buðu sex stjórnmálasamtök fram lista í öllum kjördæmum. Af 756 frambjóðendum á landinu öllu voru 399 karlar (52,8%) og 357 konur (47,2%). Í þremur efstu sætum framboðslistanna var hlutfall kvenna lægra, eða 43,5%, og enn lægra meðal kjörinna þingmanna, eða 31,7%, en kjörnar voru 20 konur og 43 karlar. Fjölgaði um eina konu á þingi frá kosningunum 2003.
Úrslit kosninganna 12. maí 2007 urðu þau að gild atkvæði voru 182.169 (98,4%), auðir seðlar 2.517 (1,4%) og ógildir 385 (0,2%). Framsóknarflokkur hlaut 11,7% gildra atkvæða og 7 menn kjörna, Sjálfstæðisflokkur 36,6% og 25 þingmenn, Frjálslyndi flokkurinn 7,3% og 4 þingmenn, Samfylkingin 26,8% og 18 þingmenn, Vinstrihreyfingin – grænt framboð 14,3% og 9 þingmenn, en Íslands-hreyfingin fékk 3,3% gildra atkvæða og engan þingmann.
Alþingiskosningar 12. maí 2007 - Hagtíðindi