Árið 2014 fæddust 4.375 börn á Íslandi, sem er svipaður fjöldi og á árinu 2013 þegar það fæddust 4.326 börn. Það komu 2.233 drengir og 2.142 stúlkur í heiminn árið 2014, sem jafngildir 1.042 drengjum á móti hverjum 1.000 stúlkum. Helsti mælikvarði á frjósemi er fjöldi lifandi fæddra barna á ævi hverrar konu og er yfirleitt miðað við að frjósemi þurfi að vera um 2,1 barn til þess að viðhalda mannfjöldanum til lengri tíma litið. Árið 2014 var frjósemi íslenskra kvenna 1,93 börn á ævi hverrar konu, eða sú sama og árið 2013, en þá hafði hún farið undir tvö í fyrsta sinn frá 2003. Undanfarin ár hefur frjósemi á Íslandi verið rétt um tvö börn á ævi hverrar konu. Frjósemin nú er nærri helmingi minni en hún var um 1960, en þá gat hver kona vænst þess að eignast rúmlega fjögur börn á ævi sinni.
Frjósemi á Íslandi hefur verið hærri en annars staðar í Evrópu á síðustu árum. Ásamt Íslandi hefur frjósemi verið yfir tveimur í Frakklandi, á Írland og í Tyrklandi síðustu ár, en 2013 voru öll löndin undir tveimur fyrir utan Tyrkland. Þá var frjósemi að meðaltali 1,55 í 28 löndum Evrópusambandsins árið 2013. Lægst hefur fæðingartíðnin innan álfunnar verið í löndum Suður-Evrópu og árið 2013 er engin undantekning á því. Hún var 1,21 í Portúgal, 1,27 á Spáni og 1,30 á Grikklandi og Kýpur. Einnig var frjósemin undir 1,3 í Póllandi árið 2013.
Flest börn fæðast í Reykjavík
Flest nýfædd börn í fyrra voru skrásett með lögheimili í Reykjavík (1.714), í Kópavogi (453) og í Hafnarfirði (380). Flestar fæðingar voru í júlímánuði (435) en fæstar í desember og apríl (323). Árið 2013 fæddust flest börn í ágúst (402) og fæst í desember (329).
Meðalaldur mæðra hefur hækkað
Meðalaldur mæðra hefur hækkað jafnt og þétt síðustu áratugi og konur eignast sitt fyrsta barn síðar á ævinni en áður. Frá byrjun sjöunda áratugarins og fram yfir 1980 var meðalaldur frumbyrja undir 22 árum en eftir miðjan níunda áratuginn hefur meðalaldurinn hækkað og var 27,3 ár í fyrra. Algengasti barneignaaldurinn er á milli 25-29 ára. Á þessu aldurbili fæddust 122,8 börn á hverjar 1.000 konur í fyrra. Fæðingartíðni mæðra undir tvítugu í fyrra var 7,5 börn á hverjar 1.000 konur. Það er afar lágt miðað við þegar hún fór hæst á árabilinu 1961-1965, en þá fæddust 84 börn á hverjar 1.000 konur undir tvítugu. Til samanburðar var meðalaldur frumbyrja var 28,7 ára í 28 löndum Evrópusambandsins árið 2013, yngstar voru frumbyrjur í Búlgaríu (25,7 ára) en elstar á Ítalíu (30,6 ára).
Undir 30% barna fæðist innan hjónabands
Árið 2014 fæddust undir 30% barna í hjónabandi (29,5%) og er það í fyrsta sinn sem hlutfall barna fæddra innan hjónabands fer undir 30% á Íslandi. Rúmlega 53% barna fæddust í óvígðri sambúð árið 2014 og 17% barna fæddust því utan sambúðar eða hjónbands í fyrra.
Af 28 löndum Evrópusambandsins fæðast 40% barna utan hjónabands. Næstólíklegast, á eftir Íslandi, er að börn fæðist innan hjónabands í Búlgaríu (59,1%), Eistlandi (58,4%) og síðan Slóveníu (58%). Til samanburðar fæðast varla börn utan hjónabands í Tyrklandi (2,7%) og það sama er hægt að segja um Grikkland (7%). Á Norðurlöndunum var rúmlega helmingur allra barna fæddur utan hjónabands árið 2013.
Aðferðir
Tölur um fæðingar ná til allra barna mæðra sem eiga lögheimili á Íslandi, hvort heldur sem þau eru fædd innanlands eða utan. Börn sem fædd eru á Íslandi af mæðrum sem eiga lögheimili erlendis eru ekki talin með.
Með fæðingum á Íslandi eru taldar 51 fæðingar erlendis, enda höfðu mæður þeirra barna lögheimili á Íslandi þegar þær fæddu börn sín.