Talsvert færri gengu í hjónaband hér á landi í fyrra en nokkur undanfarin ár. Kirkjulegum hjónavígslum fækkar en borgaralegar hjónavígslur standa í stað. Skilnaðartíðni hefur lítið breyst hér á landi undanfarinn aldarfjórðung en 36% hjónabanda enda með skilnaði.
Samkvæmt bráðabirgðatölum Hagstofu Íslands gengu 1.480 pör í hjónaband á Íslandi árið 2009. Er það talsverð fækkun miðað við fyrri ár. Árið 2008 gengu 1.704 pör í hjónaband og 1.797 árið 2007. Aldrei hafa fleiri gengið í hjónaband hér á landi en árið 2007.
Kirkjulegum hjónavígslum fækkar
Fækkun hjónavígslna er eingöngu bundin kirkjulegum vígslum, en þeim fækkaði um 243 frá 2008 til 2009. Borgarlegar vígslur hafa hins vegar aðeins einu sinni verið fleiri á einu ári. Þær voru 352 árið 2009, einni færri en árið 2007 þegar þær voru flestar.
Í fyrra staðfestu 20 pör samvist sína, 10 pör karla og 10 pör kvenna. 1.735 pör skráðu sig í óvígða sambúð, þar af 1.717 af gagnstæðu kyni og 18 af sama kyni (fimm pör karla og 13 pör kvenna). Lögskilnaðir voru 550 á árinu og níu pör í staðfestri samvist skildu að lögum. 715 pör skráðu sig úr sambúð, þar af 703 af gagnstæðu kyni og 12 af sama kyni.
Langflest hjónabönd eiga sér stað að undangenginni óvígðri sambúð, en nær 83% allra hjónaefna bjuggu saman áður en þau festu ráð sitt. Árið 2009 skráðu 1.717 pör af gagnstæðu kyni sig í óvígða sambúð hjá Þjóðskrá. Þetta samsvarar 5,4 af hverjum 1.000 íbúum. Nýskráningar sambúðar reiknast því vera heldur fleiri en hjónavígslur sem voru 4,6 af hverjum 1.000 íbúum árið 2009.
Einstaklingar eru talsvert yngri við stofnun sambúðar en hjúskapar. Meðalaldur karla við stofnun sambúðar var 29,5 ár en kvenna 27,3 ár. Meðalgiftingaraldur áður ókvæntra karla var hins vegar 34,5 ár og kvenna 31,8 ár árið 2009.
36% hjónabanda enda með skilnaði
Árið 2009 urðu 550 lögskilnaðir, en það jafngildir 1,7 lögskilnaði á hverja 1.000 íbúa. Skilnaðartíðnin hefur lítið breyst undanfarinn aldarfjórðung. Erfitt er að leggja mat á hlutfall hjónabanda sem enda með skilnaði, enda er aðeins vitað um skilnaði sem þegar hafa orðið. Með því að skoða uppsafnað skilnaðarhlutfall eftir lengd hjónabands á viðmiðunarárinu má þó áætla að tæplega 36% hjónabanda á Íslandi endi með skilnaði.
Sambúð varir skemur en hjónaband
Árið 2009 slitu 703 pör sambúð samkvæmt bráðabirgðatölum. Í meira en helmingi tilvika (51,5%) hafði sambúð staðið skemur en þrjú ár þegar henni var slitið. Sambúð varir talsvert skemur en hjónaband en 12,9% hjónabanda höfðu staðið skemur en þrjú ár þegar lögskilnaður fór fram. Hjónabönd sem enduðu með lögskilnaði árið 2009 höfðu að meðaltali enst í 13,3 ár.