Hagstofa Íslands vekur athygli á því að senn fjölgar íbúum hér á landi í 300.000. Af þessu tilefni hefur verið komið upp mannfjöldaklukku á vef Hagstofunnar þar sem landsmenn geta fylgst með áætluðum mannfjölda frá degi til dags. Fólksfjölgun hefur verið óvenjumikil undanfarið ár og ef fer fram sem horfir gætu landsmenn orðið 300.000 á fyrri hluta næsta árs. Í þessu sambandi er þó rétt að hafa í huga að nokkur óvissa er um skráningu útlendinga í flutningum til og frá landinu. Þannig getur dregist að útlendingar sem fá dvalarleyfi séu skráðir í þjóðskrá og að sama skapi geta liðið nokkrir mánuðir þar til einstaklingar sem flytjast af landi brott eru felldir úr íbúaskrá.   

Hagstofan birtir nú upplýsingar um fólksfjölda eftir sveitarfélögum hinn 1. desember 2005. Hinn 15. mars n.k. verður gerð ítarlegri greining á mannfjölda 31. desember 2005.  

Samkvæmt þjóðskrá hinn 1. desember 2005 voru íbúar 299.404. Ári áður taldi þjóðin 293.291 og hefur landsmönnum því fjölgað um 2,1% á einu ári. Þetta er meiri fjölgun en verið hefur mörg undanfarin ár. Á ársgrundvelli eru fæðingar rúmlega 4.200 og dauðsföll 1.800, og því lætur nærri að aðfluttir umfram brottflutta frá útlöndum hafi verið 3.700 talsins. Um þessa þætti mannfjöldans verður fjallað nánar í fréttum Hagstofunnar á árinu 2006.

Íbúum fjölgar nú í öllum landshlutum nema á Vestfjörðum og Norðurlandi vestra. Mynd 1 sýnir að fólksfækkun í þessum tveimur landshlutum er áþekk því sem verið hefur undanfarin ár. Fólksfækkun varð í nær öllum sveitarfélögum í þessum tveimur landshlutum.

Að þessu sinni er fólksfjölgun á höfuðborgarsvæðinu hlutfallslega minni en í allmörgum landshlutum utan þess. Á höfuðborgarsvæðinu var fólksfjölgun þannig minni en landsmeðaltalið, 1,7% samanborið við 2,1% fyrir landið í heild. Fólksfjölgun á höfuðborgarsvæðinu er nokkru meiri en í fyrra en álíka mikil og var næstu fimm árin þar á undan. Eins og mörg undanfarin ár fækkaði íbúum á Seltjarnarnesi (-1,9%) og í Reykjavík var fólksfjölgun minni en í öðrum sveitarfélögum á höfuðborgarsvæðinu (0,9% samanborið við 1,7%). Íbúum fjölgaði hlutfallslega mest í minnstu sveitarfélögunum á höfuðborgarsvæðinu (í Kjósarhreppi og Sveitarfélaginu Álftanesi). Utan þeirra var fjölgunin mest í Mosfellsbæ (5,5%) og Garðabæ (4,3%).

Undanfarin ár hefur fólksfjölgun verið óvenju mikil í nokkrum sveitarfélögum í nágrenni höfuðborgarsvæðisins. Á árinu 2004 var fólksfjölgun í Hveragerði þannig meiri en víðast hvar annars staðar á landinu og raunar talsvert meiri en í flestum sveitarfélögum á höfuðborgarsvæðinu. Á þessu ári hefur fjölgun verið mikil í öllum landshlutum sem liggja að höfuðborgarsvæðinu. Langmest var hún í sveitarfélögum á Suðurnesjum en þar fjölgaði íbúum um 4,7%. Fólksfjölgun var mikil í öllum sveitarfélögum á Suðurnesjum, mest í Sandgerði (9,8%) en minnst í Reykjanesbæ (3,6%). Á Suðurlandi var fólksfjölgun 2,8%. Af einstökum sveitarfélögum var hún einna mest í Sveitarfélaginu Árborg (6,7%). Nokkuð hefur dregið úr fólksfjölgun í Hveragerði frá því sem var í fyrra en þar fjölgaði íbúum nú um 3,4%. Í nokkrum sveitarfélögum á Suðurlandi fækkaði íbúum, einkum í Vestmannaeyjum (-1,2%) og sveitarfélögum á austanverðu Suðurlandi. Fólksfjölgun á Vesturlandi í heild var 3,1% en þar einskorðast fólksfjölgun að mestu við stærstu þéttbýlisstaðina.     

Talsverðar breytingar hafa orðið á mannfjölda á Austurlandi undanfarin þrjú ár. Fólksfækkun var talsverð á 10. áratug 20. aldar. Með tilkomu virkjana- og stóriðjuframkvæmda hefur þróunin á Austurlandi snúist við og undanfarin tvö ár hefur íbúum hvergi fjölgað meira en á Austurlandi. Á síðasta ári fjölgaði íbúum þar um hvorki meira né minna en 10,3%. Fólksfjölgun var hlutfallslega mest í Fljótsdalshreppi (36,0%), Fljótsdalshéraði (16,1%) og í Fjarðabyggð (22,7%). Það vekur athygli að í flestum öðrum sveitarfélögum á Austurlandi fækkaði íbúum. 

Athugun á samsetningu mannfjöldans á einstökum landsvæðum leiðir í ljós athyglisverðan mun. Áberandi er hversu mikill fjöldi útlendinga býr nú á Austurlandi samanborið við landið í heild; 24,6% allra karla og 6,4% allra kvenna á Austurlandi eru þannig með erlent ríkisfang (sbr. Tafla 1). Í öðrum landshlutum er hlutfall erlendra ríkisborgara mun lægra og hvergi annars staðar er áberandi munur á hlut kynjanna. Athygli vekur að frá 1. desember 2004 hefur íbúum með íslenskt ríkisfang fækkað á Austurlandi. Sú mikla fólksfjölgun sem átti sér stað verður því einungis rakin til aðstreymis útlendinga.

Mynd 2 sýnir að frá 1. desember 2004 til 1. desember 2005 fjölgaði körlum á Austurlandi um 17% en konum einungis um 2%. Búferlaflutningar karla frá útlöndum til Austurlands hafa að vonum haft í för með sér afar ójafnt kynjahlutfall en þar eru karlar nú 1.358 á hverjar 1.000 konur. Kynjahlutfall á landsvísu er aftur á móti nokkuð jafnt eða 1.016 karlar á hverjar 1.000 konur.

Talnaefni - Sveitarfélög
Talnaefni - Byggðakjarnar