Samtals bjuggu 366.700 manns á Íslandi, 188.330 karlar og 178.370 konur. Landsmönnum fjölgaði um 560 á ársfjórðungnum eða um 0,2%. Á höfuðborgarsvæðinu bjuggu 234.910 manns en 131.790 utan þess.

Flutningsjöfnuður erlendra ríkisborgara neikvæður í fyrsta sinn síðan 2012
Alls fæddust 1.090 börn á 2. ársfjórðungi 2020, en 550 einstaklingar létust. Á sama tíma fluttust 25 einstaklingar til landsins umfram brottflutta. Aðfluttir einstaklingar með íslenskt ríkisfang voru 280 umfram brottflutta, en brottfluttir erlendir ríkisborgarar voru 260 fleiri en þeir sem fluttust til landsins. Fleiri karlar en konur fluttust frá landinu.

Flestir erlendir ríkisborgarar fluttust til Póllands
Danmörk var helsti áfangastaður brottfluttra íslenskra ríkisborgara en þangað fluttust 80 manns á 2. ársfjórðungi. Til Danmerkur, Noregs og Svíþjóðar fluttust 170 íslenskir ríkisborgarar af 290 alls. Af þeim 1.350 erlendu ríkisborgurum sem fluttust frá landinu fóru flestir til Póllands, 430 manns.

Flestir aðfluttir íslenskir ríkisborgarar komu frá Danmörku (170), Noregi (60) og Svíþjóð (110), samtals 350 manns af 570. Pólland var upprunaland flestra erlendra ríkisborgara en þaðan fluttust 270 til landsins af alls 1.100 erlendum innflytjendum. Litháen kom næst, en þaðan fluttust 80 erlendir ríkisborgarar til landsins. Í lok annars ársfjórðungs bjuggu 50.670 erlendir ríkisborgarar á Íslandi eða 13,8% af heildarmannfjölda.

Mannfjöldinn er reiknaður eins og hann stendur samkvæmt þjóðskrá.

Talnaefni

Nánari upplýsingar

Deila