Í fyrra fengu 728 einstaklingar íslenskan ríkisborgararétt en 914 árið 2008. Aldrei höfðu fleiri fengið íslenskan ríkisborgararétt en árið 2008. Til samanburðar má geta þess að árið 1991 fékk 161 einstaklingur íslenskan ríkisborgararétt en þeim hefur fjölgað jafnt og þétt síðan, eins og sjá má á mynd 1.
Fleiri konur fá íslenskt ríkisfang en karlar
Árið 1991 fengu fleiri karlar en konur íslenskt ríkisfang, en allar götur síðan hafa konur verið í meirihluta nýrra íslenskra ríkisborgara. Svo var og í fyrra þegar 414 konur fengu íslenskan ríkisborgararétt en 314 karlar.
Flestir frá Evrópu
Flestir af nýjum ríkisborgurum árið 2009 voru frá Evrópu, þar af 153 frá Póllandi og 76 frá Serbíu. Næstflestir voru frá Asíu, þar af 106 frá Filippseyjum. Þetta er svipuð skipting og undanfarin ár.
Á síðustu 20 árum hafa þær breytingar orðið helstar að fólki með ríkisfang í Ameríku hefur fækkað mest í hópi nýrra íslenskra ríkisborgara, úr um 20% árin 1991-1995 í um 10% á allra síðustu árum.
