Fiskafli íslenskra skipa dróst saman um 25,7% á föstu verði í febrúar 2014 samanborið við febrúar árið áður. Í tonnum talið dróst afli saman um 56,2% og hefur mikill samdráttur í loðnuafla þar mest að segja. Botnfiskafli dróst mun minna saman í febrúar milli ára heldur en uppsjávarafli eða um 10,5%. Magnvísitalan tekur tillit til verðhlutfalla milli einstakra fisktegunda og þar sem botnfiskaflinn er verðmætari en uppsjávaraflinn er samdráttur aflans á föstu verði er mun lægri í prósentum talið heldur en samdráttur aflans í tonnum.

¹ Afli á föstu verði er reiknaður út til þess að finna breytingu á verðmæti heildaraflans að gefinni þeirri forsendu að verðhlutföll milli einstakra fisktegunda séu þau sömu og á ákveðnu viðmiðunartímabili sem hér er fiskveiðiárið 2012-2013.

²Upplýsingar um fiskafla sem birtast í þessari fréttatilkynningu eru bráðabirgðatölur. Þær byggjast á upplýsingum Fiskistofu sem berast frá löndunarhöfnum innanlands (Lóðs), útflytjendum afla og frá umboðsmönnum erlendis og er safnað af Fiskistofu.