Afli íslenskra fiskiskipa var 125,6 þúsund tonn í maí 2020 sem er 3% meiri afli en í sama mánuði í fyrra. 12% samdráttur varð á veiðum á botnfiski, utan þorskafla sem jókst um 1% og var hann tæplega 26,7 þúsund tonn. Af uppsjávarfiski veiddust tæp 80 þúsund tonn sem er 14% meira en í maí 2019, en meginuppistaða uppsjávaraflans var kolmunni. Strandveiðitímabilið hófst í maí og var afli strandveiðibáta mjög álíka og á fyrri árum þar sem um 94% af aflanum er þorskur veiddur á handfæri.

Heildarafli á 12 mánaða tímabili frá júní 2019 til maí 2020 var 969 þúsund tonn sem er 12% minni afli en á sama tímabili ári fyrr.

Afli í maí, metinn á föstu verðlagi, var 8,9% minni en í maí 2019.

Upplýsingar um fiskafla sem birtast í þessari fréttatilkynningu eru bráðabirgðatölur. Þær byggja á upplýsingum Fiskistofu sem berast frá löndunarhöfnum innanlands (Lóðs), útflytjendum afla og frá umboðsmönnum erlendis.

Talnaefni

Nánari upplýsingar

Deila