Heildarafli íslenskra skipa¹ í nýliðnum ágústmánuði var liðlega 75.600 tonn sem er rúmlega 58.000 tonnum minni afli en í ágústmánuði 2003 en þá veiddust tæplega 133.900 tonn. Milli ágústmánaða 2003 og 2004 jókst verðmæti fiskaflans, á föstu verði ársins 2002, um 0,3%. Það sem af er árinu 2004 hefur verðmæti fiskaflans, á föstu verði ársins 2002, dregist saman um 0,7% miðað við árið 2003.
     Botnfiskafli var 36.500 tonn samanborið við 29.900 tonn í ágústmánuði 2003 og jókst því um 6.600 tonn á milli ára. Þorskafli var 13.500 tonn en 12.800 tonn bárust á land í ágúst 2003 og er það aukning um rúm 600 tonn. Af ýsu veiddust 5.100 tonn en í fyrra veiddust 4.200 tonn og nemur aukning ýsuaflans því 900 tonnum. Úthafskarfaafli var tæplega 7.200 tonn í ágústmánuði í ár en tæplega 1.000 tonn í fyrra og er það 6.200 tonna aukning milli ára.
     Flatfiskafli var 2.400 tonn og dróst saman um 150 tonn frá ágústmánuði 2003. Grálúðuaflinn nam 1.500 tonnum sem er 250 tonnum minna en í sama mánuði í fyrra.
     Afli uppsjávartegunda nam 32.700 tonnum, þar af síldarafli 19.900 tonnum og kolmunnaafli 12.700 tonnum. Í samanburði við afla ágústmánaðar 2003 er samdráttur í kolmunna 72.000 tonn en síldarafli jókst um 8.400 tonn.
     Skel- og krabbadýraafli var 4.000 tonn samanborið við 5.100 tonna afla í júlí 2003. Aflasamdráttur í rækju nam rúmlega 1.100 tonnum en afli annarra skel- og krabbadýra breyttist lítið.
     Heildarafli íslenskra skipa það sem af er árinu 2004 nemur 1.302.000 tonnum og er það 207.000 tonna minni afli en á sama tímabili ársins 2003. Botnfiskafli var 329.000 tonn sem er 15.600 tonnum meiri afli en í fyrra. Flatfiskafli er 4.100 tonnum minni en í fyrra og uppsjávarafli er 209.000 tonnum minni í ár. Nemur samdráttur í loðnuafla 162.800 tonnum, 35.300 tonnum í síldarafla og samdráttur í kolmunnaafla var tæplega 10.500 tonn. Þá hefur skel- og krabbadýraafli dregist saman um 9.500 tonn en samdráttur er í öllum helstu tegundum skel- og krabbadýra.

Talnaefni