Árið 2011 var heimsafli 94,6 milljónir tonna og jókst um 4,6 milljónir tonna frá árinu 2010, samkvæmt tölum Matvæla- og landbúnaðarstofnunar Sameinuðu þjóðanna (FAO). Kyrrahafið gaf mestan afla og stærsta einstaka fisktegundin var perúansjósa. Asía var sú heimsálfa sem átti stærsta hlutann í heimsaflanum, næst kom Ameríka og svo Evrópa. Kínverjar veiddu mest allra þjóða árið 2011 en Norðmenn, sem veiddu mest allra Evrópuþjóða, voru í 11. sæti heimslistans. Íslendingar veiddu næst mest allra Evrópuþjóða en voru í 18. sæti heimslistans, einu sæti ofar en í fyrra.

Tölur frá Alþjóðahafrannsóknarráðinu (ICES) um afla erlendra ríkja við Ísland árið 2011 og 2012 liggja ekki enn fyrir og verða birtar um leið og þær berast Hagstofu.