Aflaverðmæti 8 milljarðar króna
Aflaverðmæti íslenskra skipa nam 8 milljörðum króna í janúar 2010 samanborið við 7,3 milljarða í janúar 2009. Aflaverðmæti hefur því aukist um tæpar 700 milljónir eða 9% á milli ára.

Aflaverðmæti botnfisks var 6,8 milljarðar og jókst um 16% frá janúar í fyrra þegar aflaverðmætið nam tæpum 5,9 milljörðum. Verðmæti þorskafla var um 4,1 milljarðar og jókst um 21% frá fyrra ári. Aflaverðmæti ýsu nam tæpum 1,3 milljarði og jókst um 16% en verðmæti karfaaflans nam tæpum 500 milljónum, sem er 15% samdráttur frá janúar 2009. Verðmæti ufsaaflans jókst um 29% milli ára í 372 milljónir.

Verðmæti uppsjávarafla nam 657 milljónum króna í janúar 2010, sem er um 32% samdráttur frá fyrra ári. Aflaverðmæti flatfisksafla nam 528 milljónum, sem er 5% aukning miðað við janúar 2009.
 
Verðmæti afla sem seldur er í beinni sölu útgerða til vinnslu innanlands nam 3,7 milljörðum króna í janúar og jókst um 5% miðað við janúar 2009. Verðmæti afla sem keyptur er á markaði til vinnslu innanlands jókst um 39% milli ára og var um 2 milljarðar í janúar 2010. Aflaverðmæti sjófrystingar nam 1,6 milljarði í janúar og jókst um 46% milli ára en verðmæti afla sem fluttur er út óunninn nam 718 milljónum, sem er 30% samdráttur frá janúar 2009.

Af tæknilegum ástæðum hefur birtingaráætlun á mánaðarlegum fréttum yfir verðmæti sjávarafurða verið endurskoðuð fyrir árið 2010. Mun því næsta frétt yfir verðmæti sjávarafurða janúar-febrúar 2010 verða birt 28. maí 2010 í stað áður áætlaðrar dagsetningar, sem var 19. maí 2010.