Aflaverðmætið 45,9 milljarðar króna og dregst saman um 3,5%
Á fyrstu átta mánuðum ársins 2004 var aflaverðmæti íslenskra skipa af öllum miðum 45,9 milljarðar króna samanborið við 47,6 milljarða króna á sama tímabili 2003. Aflaverðmæti hefur því dregist saman um 3,5% á milli ára eða tæplega 1,7 milljarða króna, á verðlagi hvors árs fyrir sig. Verðmæti botnfiskaflans var 30,8 milljarðar króna og er það örlitlu meiri verðmæti en á árinu 2003 (0,2%). Verðmæti þorsks hefur á þessu tímabili aukist um 1,3 milljarða króna (7,2%) og verðmæti ýsuaflans um 900 milljónir (26,2%) en karfaafli hefur dregist saman um einn miljarð króna (-28,7%) og úthafskarfaaflinn hefur dregist saman um tæplega 600 milljónir króna (-19,3%). Verðmæti flatfisktegunda hefur vaxið lítillega (1,6%) en verðmæti uppsjávartegunda hefur dregist saman um 900 milljónir króna (-9,8). Þá hefur verðmæti skel- og krabbadýraaflans dregist saman um tæplega 900 milljónir (-29,2%) og er það að stærstum hluta rækja.
Á tímabilinu hefur mikil hlutfallsleg aukning orðið í útflutningi á ferskum fiski í gámum (55,9%) og þannig nam verðmæti þessa afla 3,8 milljörðum króna. Einnig hefur orðið mikil aukning í verðmæti þess afla sem keyptur er á innlendum fiskmörkuðum en er fluttur óunninn á erlenda markaði í gámum (63%). Þetta kann að skýra að siglingar íslenskra fiskiskipa með afla hafa dregist saman um tæplega þriðjung. Verðmæti afla í beinni sölu útgerða til vinnslustöðva var 21,2 milljarðar króna samanborið við 22,6 milljarða króna á sama tímabili 2003 og er það samdráttur um 1,4 milljarða króna (-6,2%). Verðmæti afla sem seldur var á fiskmörkuðum til fiskvinnslu innanlands var 6,6 milljarðar króna og dróst saman um tæplega 200 milljónir króna (2,5%). Verðmæti sjófrysts afla var 12,8 milljarðar króna samanborið við 14 milljarða króna á árinu 2003 sem er samdráttur um 8,3%.
Á Suðurnesjum var unnið úr afla að verðmæti 8 milljarða króna og er það aukning um 434 milljónir króna á milli ára eða 3,3%. Annarsstaðar á landinu er um samdrátt að ræða og var hann mestur á Austurlandi eða 900 milljónir króna (-13,5%). Norðurland eystra heldur einna best sínu hlutskipti en samt varð samdrátturinn þar ríflega 420 milljónir króna (-5,5%). Verðmæti afla íslenskra skipa sem unninn var erlendis jókst um 1,2 milljarða króna (40,1%) frá fyrra ári og var 4,1 milljarður króna á fyrstu átta mánuðum ársins 2004.
Upplýsingar um afla og aflaverðmæti¹ janúar-ágúst 2004 er að finna í talnaefni.
|
¹ Þessar upplýsingar byggja á vigtar- og ráðstöfunarskýrslum sem Fiskistofa safnar frá fiskkaupendum. Fyrir árið 2004 er stuðst við bráðabirgðatölur en endanlegar tölur liggja að baki talna fyrir árið 2003. Athuganir benda til þess að endanlegar tölur séu að hámarki 1-2% hærri en bráðabirgðatölur þegar á heildina er litið en fyrir örfáar fisktegundir getur munurinn þó orðið meiri. |