Aflaverðmætið 10,7 milljarðar króna

Á fyrstu tveimur mánuðum ársins 2004 nam aflaverðmæti íslenskra skipa af öllum miðum 10,7 milljörðum króna samanborið við 11,8 milljarða á sama tímabili 2003. Aflaverðmæti hefur því dregist saman um 9,3% á milli ára eða um nærri 1,1 milljarð króna. Verðmæti botnfiskaflans var 7,4 milljarðar króna og jókst um 82 milljónir króna eða um 1,1%. Verðmæti þorsks var 4,9 milljarðar króna og jókst saman um 5,5% og verðmæti ýsuaflans nam 1,1 milljarði króna og dróst saman um 2,1%. Verðmæti loðnuaflans nam tæplega 2,5 milljörðum króna og dróst saman um rúman milljarð króna eða um 29,8%. Þá var verðmæti skel- og krabbadýraafla 118 milljónir króna en var 390 milljónir króna á sama tímabili 2003 og er munurinn 69,7% eða 272 milljónir króna.
     Verðmæti afla í beinni sölu útgerða til vinnslustöðva var á tímabilinu 5,3 milljarðar króna samanborið við 6,7 milljarða á árinu 2003 og er það samdráttur um fimmtung. Verðmæti sjófrysts afla var 2,4 milljarðar króna en nam rúmum 2.1 milljarði króna á fyrstu tveimur mánuðum ársins 2003 og er þetta aukning um 13.2% á milli ára. Verðmæti afla sem seldur var á innlendum fiskmörkuðum til fiskvinnslu innanlands dróst saman um 4,9%, var 1,8 milljarðar króna samanborið við 1,9 milljarða króna á sama tímabili 2003. Í gámum var fluttur út ferskur fiskur fyrir 927 milljónir króna sem er rúmlega þriðjungs aukning frá fyrra ári en þá var verðmætið 690 milljónir.
     Á Suðurnesjum var unnið úr afla að verðmæti 2,1 milljarður króna sem er nærri sama upphæð og á árinu 2003. Mestur samdráttur milli ára varð á Austurlandi, 550 milljónir króna eða 24,5%. Verðmæti afla íslenskra skipa sem unninn var erlendis jókst um 21,3%, úr rúmum 850 milljónum á fyrstu tveimur mánuðum ársins 2003 í rúman milljarð á sama tímabili 2004.
     Upplýsingar um afla og aflaverðmæti janúar-febrúar 2004 er að finna í talnaefni.

Talnaefni