Aflaverðmæti eykst um 13,7%
Aflaverðmæti íslenskra skipa nam 95,6 milljörðum króna á fyrstu sjö mánuðum ársins 2012 samanborið við 84,1 milljarð á sama tímabili 2011. Aflaverðmæti hefur því aukist um 11,5 milljarða eða 13,7% á milli ára.

Aflaverðmæti botnfisks var 58,9 milljarðar og jókst um 7,7% frá sama tíma í fyrra þegar aflaverðmætið nam 54,6 milljörðum. Verðmæti þorskafla var um 30,1 milljarður og jókst um 14,3% frá fyrra ári. Aflaverðmæti ýsu nam 8 milljörðum og jókst um 18,7% en verðmæti karfaaflans nam 8,6 milljörðum, sem er 14,4% aukning frá fyrstu sjö mánuðum ársins 2011. Verðmæti ufsaaflans jókst um 4,8% milli ára og nam 5,1 milljarði króna í janúar til júlí 2012.

Verðmæti uppsjávarafla nam um 25,4 milljörðum króna í janúar til júlí 2012, sem er 28,8% aukning frá fyrra ári. Sú aukning skýrist að mestu af loðnuafla að verðmæti rúmum 13 milljörðum króna samanborið við 8,7 milljarða fyrstu sjö mánuði ársins 2011. Einnig var 1,6 milljarða króna aukning í kolmunnaafla, sem nam um 2,5 milljörðum króna árið 2012. Verðmæti makrílafla jókst um 1,8% á milli ára og nam tæpum 7 milljörðum króna í janúar til júlí 2012. Nær enginn annar uppsjávarafli var veiddur fyrstu sjö mánuði ársins 2012, samanborið við gulldepluafla að verðmæti 261 milljón króna á sama tímabili árið 2011. Aflaverðmæti flatfisksafla nam um 7,2 milljörðum króna, sem er 12,6% aukning frá janúar til júlí 2011.
 
Verðmæti afla sem seldur er í beinni sölu útgerða til vinnslu innanlands nam 47,1 milljarði króna og jókst um 22,5% miðað við fyrstu sjö mánuði ársins 2011. Verðmæti afla sem keyptur er á markaði til vinnslu innanlands jókst um 14,4% milli ára og nam 13,6 milljörðum króna. Aflaverðmæti sjófrystingar nam rúmum 30,6 milljörðum í janúar til júlí og jókst um 4,7% milli ára en verðmæti afla sem fluttur er út óunninn nam rúmum 3,5 milljörðum króna, sem er 7% samdráttur frá árinu 2011.