Aflaverðmæti 106 milljarðar króna
Aflaverðmæti íslenskra skipa nam rúmum 106 milljörðum króna á fyrstu ellefu mánuðum ársins 2009, samanborið við 91 milljarð yfir sama tímabil 2008. Aflaverðmæti hefur því aukist um 15 milljarða eða 16,6% á milli ára. Aflaverðmæti í nóvember nam 10,4 milljörðum króna en var 11,3 milljarðar í nóvember 2008.

Aflaverðmæti botnfisks var í lok nóvember orðið tæpir 75 milljarðar króna á árinu sem er aukning um 16,2% frá sama tíma í fyrra þegar aflaverðmætið nam rúmum 64 milljörðum. Verðmæti þorskafla var 33,2 milljarðar og jókst um 12,4% frá fyrra ári. Aflaverðmæti ýsu nam rúmum 14 milljörðum, sem er 1,1% aukning milli ára. Verðmæti karfaaflans nam 9,1 milljarði sem er 9,4% aukning frá fyrstu ellefu mánuðum ársins 2008. Verðmæti ufsaaflans nam 6,7 milljörðum, jókst um 18% milli ára og verðmæti annars botnfisksafla jókst í heild um 37,3% miðað við fyrstu ellefu mánuði ársins 2008.

Verðmæti flatfiskafla nam 9,2 milljörðum króna í janúar til nóvember 2009 sem er 59,1% aukning frá fyrra ári. Verðmæti uppsjávarafla jókst um 3,2% milli ára og nam 20,6 milljörðum króna frá janúar til nóvember 2009.

Verðmæti afla sem seldur er í beinni sölu útgerða til vinnslu innanlands nam 39,8 milljörðum króna fyrstu ellefu mánuði ársins og jókst um 17,4% frá fyrra ári. Verðmæti afla sem keyptur er á markaði til vinnslu innanlands jókst um 15,9% milli ára og nam 14 milljörðum króna. Aflaverðmæti sjófrystingar nam 37,6 milljörðum, samanborið við 30,7 milljarða árið áður. Verðmæti afla sem fluttur er út óunninn nam um 12,4 milljörðum, sem er 11,1% aukning miðað við tímabilið janúar til nóvember 2008.

Þessar upplýsingar byggja á vigtar- og ráðstöfunarskýrslum sem Fiskistofa safnar frá fiskkaupendum. Fyrir árið 2009 er stuðst við bráðabirgðatölur en endanlegar tölur liggja að baki talna fyrir árið 2008 Athuganir benda til þess að endanlegar tölur séu að hámarki 1-2% hærri en bráðabirgðatölur þegar á heildina er litið en fyrir örfáar fisktegundir getur munurinn þó orðið meiri.