Aflaverðmæti 127,2 milljarðar króna
Aflaverðmæti íslenskra skipa nam 127,2 milljörðum króna fyrstu tíu mánuði ársins 2011 samanborið við 114 milljarða á sama tímabili 2010. Aflaverðmæti hefur því aukist um 13,2 milljarða króna eða 11,6% á milli ára.

Aflaverðmæti botnfisks fyrstu tíu mánuði ársins nam 76,7 milljörðum króna og dróst saman um 2,9% sé miðað við sama tímabili árið 2010. Verðmæti þorskafla var um 36,9 milljarðar og dróst saman um 0,9% frá fyrra ári. Aflaverðmæti ýsu nam 9,5 milljörðum og dróst saman um 27,2%, en verðmæti karfaaflans nam 11,2 milljörðum, sem er 14,4% aukning miðað við sama tímabil árið  2010. Verðmæti ufsaaflans jókst um 1% milli ára í 7,3 milljarða.

Verðmæti flatfiskafla nam tæpum 8,5 milljörðum króna fyrstu tíu mánuði ársins sem er 4,6% aukning frá fyrra ári. Aflaverðmæti uppsjávarafla jókst um 56,9% milli ára og nam 38,5 milljörðum. Stafar sú aukning að stærstum hluta af verðmætaaukningu loðnuaflans, sem jókst um 250% á milli ára og nam 8,7 milljörðum króna.

Verðmæti afla sem seldur er í beinni sölu útgerða til vinnslu innanlands nam 54,4 milljörðum króna og jókst um 16,3% frá árinu 2010. Aflaverðmæti sjófrystingar var 49,8 milljarðar sem er 19,3% aukning frá fyrra ári. Verðmæti afla sem keyptur er á markaði til vinnslu innanlands nam um 16,5 milljörðum króna, sem er 1,5% aukning frá janúar-október 2010.