Heildarfjáreignir innlendra efnahagsgeira námu 1.173% af landsframleiðslu í árslok 2014 en á sama tíma töldu fjárskuldbindingar 1.449% af landsframleiðslu. Af heildarfjárskuldbindingum telja hæst fjárskuldbindingar fyrirtækja annarra en fjármálafyrirtækja en fast á hæla þeirra koma fjárskuldbindingar fjármálafyrirtækja í slitameðferð en þær eru að mestu bundnar við erlenda kröfuhafa.

Fjáreignir og –skuldbindingar fyrirtækja annarra en fjármálafyrirtækja jukust hratt 2005–2007, en hafa dregist mikið saman og náð ákveðnu jafnvægi á undanförunum árum.

Fjármálareikningar fjalla sérstaklega um fjármálafyrirtæki og undirgeira þeirra. Heildarfjáreignir fjármálafyrirtækja námu tæplega sjöfaldri landsframleiðslu í árslok 2014. Fjármálafyrirtæki í slitameðferð eru birt sem sér undirgeiri í íslensku fjármálareikningunum en ljóst er að umfang þeirra í íslenska fjármálakerfinu er umtalsvert og verður þar til uppgjör á þrotabúum föllnu bankanna liggur fyrir. Einnig eru bundnar fjármálastofnanir nú birtar sem sérstakur undirgeiri. Heildarfjáreignir þeirra námu um 82,6% af landsframleiðslu í árslok 2014.

Heildarfjáreignir lífeyrissjóða námu 2.928 mö. kr. í árslok 2014 sem samsvarar 147% af landsframleiðslu, en fjármálareikningarnir gefa góða heildarsýn yfir breytingar á eignasafni lífeyrissjóðanna.

Fjáreignir heimila stóðu í 3.981 mö. kr. í árslok 2014 en heildarfjárskuldbindingar þeirra voru 1.919 ma. kr. á sama tíma. Af fjáreignum heimilanna telja lífeyrisréttindi hæst eða tæplega 2.897 ma. kr. í árslok 2014. Hafa ber í huga að fastafjármunir, eins og fasteignir eru ekki meðtaldir í reikningunum, en samspil fjáreigna og annarra fjármuna gefa heildarsýn á eiginfjárstöðu heimilanna.

Nálgast má fjármálareikninga aftur til ársins 2003 á vefsvæði Hagstofunnar, bæði stofn- og flæðistærðir sundurliðaðar á efnahagsgeira og fjármálagerninga.

Næsta birting fjármálareikninga er í mars 2016. Upplýsingar um aðferðafræði og hugtök, sjá lýsigögn.

Fjármálareikningar – Hagtíðindi

Talnaefni (sjá Fjármálareikningar).