Hagvöxtur, þ.e. breyting á vergri landsframleiðslu á föstu verðlagi á milli ára, nam 1,3% á árinu 2025 miðað við bráðabirgðatölur. Talið er að nafnvirði vergrar landsframleiðslu hafi verið um 4.956 milljarðar króna. Á fjórða ársfjórðungi 2025 dróst landsframleiðslan saman um 0,6% frá fyrra ári.
Þjóðhagsreikningar fyrir 2025
Raunaukning einkaneyslu um 4,3% var megindrifkraftur hagvaxtar á síðasta ári en jafnframt skilaði aukin fjármunamyndun, samneysla og birgðabreytingar jákvæðu framlagi. Vöxtur þjóðarútgjalda á milli ára var um 3,9% en á móti vó neikvætt framlag utanríkisviðskipta til hagvaxtar.
Endurskoðun áður birtra hagtalna fyrir árin 2022-2024
Samhliða útgáfu á fyrsta mati landsframleiðslunnar fyrir árið 2025 hafa áður útgefnar tölur fyrir árin 2022-2024 verið endurskoðaðar. Hagvöxtur árið 2024 breytist lítillega og var þannig -1,3% í stað -1,2% í áður birtum tölum. Að auki eru litlar breytingar á niðurstöðum ársins 2023 þar sem hagvöxtur var 5,0% í stað 5,1%. Endurskoðun gefur til kynna að á árinu 2022 hafi landsframleiðslan aukist um 8,9% að raunvirði í stað 8,8% í áður birtum tölum.
Landsframleiðsla dróst saman um 0,6% á fjórða ársfjórðungi
Samkvæmt fyrsta mati er áætlað að verg landsframleiðsla (VLF) hafi dregist saman um 0,6% að raunvirði á fjórða ársfjórðungi 2025 miðað við sama tímabil fyrra árs. Einkaneysla, sem jókst um 5,5%, vegur þungt í hagvexti en jafnframt er aukning í samneyslu um 1,1% en á móti vegur um 12,5% samdráttur í fjármunamyndun. Að teknu tilliti til birgðabreytinga er áætlað að þjóðarútgjöld á fjórða ársfjórðungi hafi dregist saman um 0,5% að raunvirði miðað við sama tímabil fyrra árs.
Framlag utanríkisviðskipta til landsframleiðslu dregur hagvöxt enn frekar niður eða sem nemur um 0,3% á fjórða ársfjórðungi.
Leiðrétt fyrir árstíðabundnum sveiflum er áætlað að landsframleiðsla hafi dregist saman um 0,8% á fjórða ársfjórðungi samanborið við þriðja ársfjórðung 2025.
Einkaneysla jókst um 5,5%
Einkaneysla á fjórða ársfjórðungi jókst um 5,5% að raunvirði miðað við sama tímabil fyrra árs. Fyrir árið í heild var vöxturinn 4,3% samanborið við 0,9% vöxt árið áður. Það er því töluverð aukning í vexti einkaneyslunnar frá fyrra ári.
Innlend neysla jókst almennt á fjórða ársfjórðungi þar sem vöxtur var í kaupum heimilanna á flestum neysluvörum, þó var samdráttur t.d. í áfengi og tóbaki. Mikil aukning var í kaupum heimilanna á bifreiðum, fjórða ársfjórðunginn í röð eftir samdráttarskeið árið 2024. Fyrir áramót myndaðist hvati til bifreiðarkaupa vegna breytinga á vörugjöldum á bensín- og dísilbílum og lækkunar styrks til kaupa á rafbílum en fullur styrkur var veittur til áramóta.
Einnig var töluverður vöxtur í einkaneyslu vegna útgjalda Íslendinga á ferðalögum erlendis ásamt vægum vexti í húsnæðislið.
Samneysla jókst um 1,1% á fjórða ársfjórðungi
Magnaukning samneyslu hins opinbera á fjórða ársfjórðungi 2025 er áætluð 1,1% í samanburði við sama tímabil fyrra árs.
Áætluð magnaukning samneyslu fyrir árið 2025 nemur 1,2%. Að nafnvirði er áætlað að samneysla hins opinbera hafi aukist um 8,8% frá fyrra ári og verðbreyting samneyslu um 7,5%. Samneysla hins opinbera er áætluð út frá bráðabirgðatölum. Niðurstöður munu taka breytingum þegar uppgjör liggur fyrir í ágúst 2026.
Nánar verður fjallað um fjármál hins opinbera í útgáfu þann 12. mars næstkomandi.
Innflutningur hvers kyns tölvuíhluta fyrir gagnaver jókst verulega á fjórða ársfjórðungi ársins 2024 sem hélt áfram á fyrsta og öðrum ársfjórðungi ársins 2025 en á þriðja ársfjórðungi fór talsvert að draga úr þeim innflutningi og var hann hlutfallslega lítill á fjórða ársfjórðungi ársins 2025 og litar þetta niðurstöðu hvers ársfjórðungs að talsverðu leyti í fjármunamyndun. Eins og í einkaneyslu myndaðist hvati til fjárfestinga í bifreiðakaupum er leið á árið og er áætlað að fjármunamyndun ársins í bifreiðum hafi aukist um 72% á árinu 2025.
Utanríkisverslun
Áætlað er að vöru- og þjónustuviðskipti við útlönd hafi verið neikvæð um 24 milljarða króna á fjórða ársfjórðungi 2025 sem er töluvert minni halli en á sama ársfjórðungi fyrra árs þegar hann nam 44,2 milljörðum króna. Samdráttur í vöruútflutningi leiddi til þess að útflutningur í heild dróst saman um 5,0% á fjórða ársfjórðungi eftir aukningu á fyrstu þremur fjórðungum ársins. Að sama skapi var minni vöruinnflutningur á fjórða ársfjórðungi orsakavaldur um 4,2% samdráttar í heildarinnflutningi en á fyrstu þremur fjórðungum ársins reyndist vöxtur. Á fjórða ársfjórðungi dróst vöruinnflutningur saman um 10,4% á meðan innflutt þjónusta jókst um 8,1% að raunvirði.
Lítil heildaráhrif birgðabreytinga á fjórða ársfjórðungi
Á fjórða ársfjórðungi 2025 lækkaði heildarverðmæti birgða um 15,9 milljarða króna samanborið við þriðja ársfjórðung og er á pari við samdrátt á milli sömu ársfjórðunga árið 2024. Hér vegur þyngst 9,7 milljarða samdráttur í birgðum sjávarafurða en lækkunin er í samræmi við þróun á fjórða ársfjórðungi undanfarin ár. Verðmæti álbirgða dróst saman um 5,4 milljarða króna á fjórða ársfjórðungi sem er mikil breyting miðað við sama tímabil fyrra árs þegar lækkun á verðmæti álbirgða nam 797 milljónum. Aðrir flokkar breytast mun minna, birgðir olíu dragast saman um 552 milljónir króna og aðrar birgðir stóriðju um 183 milljónir. Óvenju miklar breytingar í álbirgðum má að stórum hluta rekja til bilunar í rafbúnaði hjá Norðuráli í október 2025.
Árstíðaleiðrétt landsframleiðsla dróst saman um 0,8%
Árstíðaleiðrétt verg landsframleiðsla dróst saman að raunvirði um 0,8% á fjórða ársfjórðungi 2025 miðað við þriðja ársfjórðung. Að lokinni árstíðaleiðréttingu mældist 1,3% aukning í einkaneyslu samanborið við fyrri ársfjórðung og 0,4% aukning í samneyslu en hins vegar dróst fjármunamyndun saman um 4,4% á milli fjórðunga. Jafnframt dróst árstíðaleiðréttur útflutningur saman um 2,6% og innflutningur um 1,6%.
Framleiðsluuppgjör
Áætlað er að birta bráðabirgðaniðurstöður framleiðsluuppgjörs fyrir árið 2025 þann 6. mars.
Ekki reyndist unnt að ljúka úrvinnslu á vinnumagnstölum fyrir útgáfu en gögnin verða uppfærð eins fljótt og auðið er.