Hagstofa Íslands hefur gefið út þjóðhagsspá í ritröð sinni Hagtíðindum. Spáin tekur til áranna 2025 til 2031.
Versnandi horfur í útflutningi lita hagvöxt næstu ára. Útlit er fyrir að hagvöxtur verði 1,7% í ár og 1,8% á næsta ári. Reiknað er með að innlend eftirspurn verði helsti drifkraftur hagvaxtar í ár en að fjárfesting láti undan á næsta ári á meðan einkaneysla og samneysla vaxa áfram.
Áætlað er að aukning einkaneyslu verði 3,2% að raunvirði í ár en vísbendingar eru um aukin útgjöld einstaklinga á þriðja ársfjórðungi. Spáð er að einkaneysla aukist um 2,4% á næsta ári og um 3% árið 2027 samhliða auknum efnahagsumsvifum. Samneysla jókst um 1,9% árið 2024 og hlutfall hennar af vergri landsframleiðslu var 25,9%. Gert ráð fyrir 1,7% vexti í ár og 1,2% árið 2026 en hægari aukningu næstu ár.
Í ár er reiknað með að atvinnuvegafjárfesting aukist um 7,7% sem má rekja til mikillar fjárfestingar í þjónustustarfsemi á sviði upplýsingatækni, sérstaklega í búnaði með gervigreind sem notaður er í gagnaverum. Árið 2026 er búist við að atvinnuvegafjárfesting dragist saman um 7,7% vegna minni fjárfestingar í tölvubúnaði. Árið 2027 er spáð 1,3% vexti. Merki eru um hægari umsvif í byggingariðnaði, þrátt fyrir aukningu í fjölda íbúða á lokastigi framkvæmda. Gert er ráð fyrir 0,9% vexti í ár, 0,8% á næsta ári og 4,7% árið 2027. Spáð er að fjárfesting hins opinbera aukist um 2,4% á yfirstandandi ári. Á fyrri hluta ársins jókst opinber fjárfesting um 6,1%, mest vegna ríkisins. Gert er ráð fyrir 7,9% vexti árið 2026, 4,4% árið 2027.
Áföll í helstu útflutningsgreinum stóriðju og ferðaþjónustu á síðastliðnum mánuðum auk minni aflaheimilda í uppsjávarveiði hafa áhrif á horfur í utanríkisviðskiptum. Áætlað er að útflutningur aukist um 1,4% í ár, um 0,1% árið 2026 og um 4,7% árið 2027. Innflutningur hefur verið öflugur á árinu en gert er ráð fyrir minni innflutningi vegna áfallanna í útflutningsgreinum. Búist er við að innflutningur aukist um 5,3% í ár en dragist saman um 3% á næsta ári. Útlit er fyrir að viðskiptahalli nemi um 2,4% af vergri landsframleiðslu í ár, að dragi úr honum þegar líður á spátímann og að jafnvægi náist undir lok hans.
Verðbólga hefur reynst þrálátari en væntingar stóðu til. Í ár er reiknað með að vísitala neysluverðs hækki að meðaltali um 4,1% milli ára. Gert er ráð fyrir að verðbólga hjaðni samhliða minni umsvifum í hagkerfinu og minnkandi spennu á vinnumarkaði en árið 2026 er reiknað með að vísitala neysluverðs hækki um 3,5% og um 2,7% árið 2027.
Horfur eru á að atvinnuleysi verði meira á þessu og næsta ári en gert var ráð fyrir í þjóðhagsspá í sumar. Vísbendingar eru um aukið jafnvægi á vinnumarkaði. Búist er við að atvinnuleysi nái hámarki í 4,3% á næsta ári og minnki þegar líða taki á spátímabilið. Það sem af er ári hefur vísitala reglulegra launa á föstu verði hækkað á milli ára en á næstu árum er áætlað að hún hækki í samræmi við gildandi kjarasamninga.
Skuldir heimila í hlutfalli við verga landsframleiðslu og ráðstöfunartekjur hafa ekki mælst minni undanfarin ár. Hlutfall vaxtagjalda heimila af ráðstöfunartekjum hefur haldist stöðugt síðastliðin tvö ár. Vanskilahlutfall einkageirans hjá innlánsstofnunum mælist nú lágt í sögulegum samanburði. Hrein erlend eignastaða hagkerfisins er sterk í sögulegum samanburði.
Hagstofan gaf síðast út þjóðhagsspá 4. júlí og er næsta útgáfa fyrirhuguð í mars nk.
Þjóðhagsspá — Hagtíðindi