Heildarlosun frá hagkerfi Íslands og heimilum fór úr 5.304 kílótonnum árið 2020 í 5.488 kílótonn árið 2021, sem samsvarar um 3,5% aukningu. Losun dróst mikið saman milli áranna 2019 og 2020, úr 6.534 kílótonnum í 5.304 kílótonn eða um 18,8%. Þessi mikla breyting kemur fyrst og fremst vegna mikilla rekstrarerfiðleika í flugrekstri í kjölfar samgöngutakmarkana og viðbragða við kórónuveirufaraldrinum.

Í nýútgefnu loftslagsbókhaldi Íslands, sem Umhverfisstofnun tekur saman í samræmi við skuldbindingar Íslands til loftslagsráðs Sameinuðu þjóðanna, kemur fram að heildarlosun innan Íslands (að undanskilinni losun frá landi og landnotkun) dróst saman um 4,3% frá 2019 til 2020, fór úr 4.713 kílótonnum í 4.510 kílótonn.

Algengur misskilningur á þessum útgefnu tölum kemur til vegna mismunandi umfangs sem tölfræðin nær til. Í losunarbókhaldi hagkerfisins er litið til losunar vegna reksturs íslenskra aðila hvar sem hann á sér stað í heiminum. Í losunarbókhaldi Íslands er eingöngu litið á losun sem á sér stað innan landsvæðis Íslands, sem þýðir að millilandaflug og siglingar eru ekki teknar með í reikninginn. Losunarbókhald Íslands gerir einnig grein fyrir losun vegna landnotkunar og landbreytinga sem eru ekki hluti af rekstri hagkerfisins og telst því ekki með sem losun frá hagkerfi Íslands.

Talnaefni