Myndun úrgangs
Árið 2014 mynduðust 799 þúsund tonn af úrgangi á Íslandi, þar af voru um 5% spilliefni. Mest af úrganginum var jarðvegur, 326 þúsund tonn, 41% af heildarmagninu. Blandaður heimilisúrgangur var um 120 þúsund tonn og efnaúrgangur frá málmvinnslum var rúm 87 þúsund tonn.

Meðhöndlun úrgangs
Af heildarmagni úrgangs fór 621 þúsund tonn, tæp 78%, í endurvinnslu eða aðra endurnýtingu. 174 þúsund tonnum, tæpum 22%, var fargað með brennslu eða urðun og 3819 tonn fóru í brennslu þar sem orkan var nýtt. Allur jarðvegur var endurnýttur í landmótun, utan 194 tonna af menguðum jarðvegi sem voru urðuð. Rúm 90% af efnaúrgangi fóru til endurvinnslu, en tæplega 10% voru brennd eða urðuð. 99% af blönduðum heimilisúrgangi voru urðuð eða brennd án orkunýtingar.

Gagnasöfnun
Gögnum var safnað af Umhverfisstofnun, sem leitar til 70 rekstraraðila, þar á meðal allra fyrirtækja sem sérhæfa sig í meðhöndlun úrgangs og fyrirtækja sem höndla eigin úrgang í samræmi við starfsleyfi. Umtalsverð breyting varð á gagnasöfnun árið 2014 þegar breyting á úrgangslögum gekk í gildi og nokkrir flokkar töldust ekki lengur úrgangur, svo sem fiskleifar sem fara í mjöl og sláturleifar sem fara í nýtingu. Einnig var tekin upp sundurliðun Hagstofu Evrópu og við það breyttust flokkunarforsendur úrgangs mikið. Einnig bættust ný fyrirtæki inn í gagnasöfnunarferlið.

Talnaefni